Գիտությունն օրհասական վիճակում է. աջակցություն «Տաշիր» ԲՀ-ի կողմից

Այսօր գիտական լրագրության մրցույթի 11 և միջազգային գիտական հանդեսներում առավելագույն հղում ունեցող ավելի քան 90 գիտնականներ «Տաշիր» բարեգործական հիմնադրամի կողմից արժանացան պարգևների: Լրագրողներին հատկացվեց 3 մլն, իսկ գիտնականներին՝ 14 մլն դրամ: Մրցույթը կազմակերպվել էր «Տաշիր» բարեգործական հիմնադրամի եւ «Պահանջում ենք գիտության ֆինանսավորման ավելացում» ֆեյսբուքյան նախաձեռնության կողմից: 

«Այս նախաձեռնությունը հիմնադրվել է մեկ տարի առաջ։ Այս մեկ տարվա ընթացքում բազմաթիվ հանդիպումներ ենք ունեցել, այդ թվում երկրի նախագահի, վարչապետի եւ ԱԺ պատգամավորների հետ։ Կազմակերպվում են միջոցառումներ և մրցանակաբաշխություններ, որոնք նպաստում են գիտնականի նկատմամբ հասարակական գիտակցության բարձրացմանը։ Այսօր «Տաշիր» բարեգործական հիմնադրամի հետ համատեղ կազմակերպվում է մրցանակաբաշխություն՝ միջազգային պարբերականներում հոդվածներ տպագրած հայ երիտասարդ գիտնականների համար, ովքեր նաև ունեն իրենց հոդվածների վրա այլ պարբերականների հղումներ։ «Տաշիր» հիմնադրամի հետ համատեղ չորս ամիս առաջ հայտարարել ենք լրագրողների մրցույթ, ովքեր մինչև մայիսի 10-ը պետք է ներկայացնեին հոդվածներ գիտության հիմնախնդիրների հետ կապված, նրանք նույնպես կարժանանային մրցանակի»,– լրագրողների հետ զրույցում նշեց ՊԳՖԱ խմբի ներկայացուցիչ Խաչիկ Գևորգյանը:  Գևորգյանի  խոսքերով՝ Հայաստանում գիտության վիճակը օրհասական է, և նմանատիպ միջոցառումները նպաստում են գիտության զարգացմանը։ Նա նաև նշեց, որ նախաձեռնության հիմնական նպատակը գիտության ֆինանսավորման խնդրի լուծումն է, որի շատ ցածր՝ 0.24 տոկոսը, պետք է կրկնապատկվի, եւ հավելեց. «Մեր այս ցուցանիշով մենք չենք զիջում միան Ղրղզստանին կարծես թե»։

«Տաշիր» բարեգործական հիմնադրամի գրասենյակի ղեկավար Արտակ Ճաղարյանն իր խոսքում նշեց. «Գիտության ոլորտը միշտ եղել է Կարեն և Սամվել Կարապետյանների ուշադրության կենտրոնում, նրանք միշտ ցանկացել են աջակցել գիտնականներին, ովքեր մեր երկրի ապագան են։ Բոլորիս խնդիրն է ոչ միայն մեր երկրում ապրող գիտնականներին աջակցելը, այլ նաև արտերկրում կրթություն ստացած գիտնականների վերադարձը Հայաստան»: Արտակ Ճաղարյանը նշեց, որ առանձնահատուկ ուշադրություն են դարձնելու Հայոց ցեղասպանության թեմայով հրապարակումներ ունեցող գիտնականների հանդեպ։ Նաև հավելեց, որ այս թեման միջազգային հարթակներում պատշաճ մակարդակով բարձրացնող մեր գիտնականները լինելու են «Տաշիր» բարեգործական հիմնադրամի ուշադրության կենտրոնում։

Lուրեր.com-ի հետ զրույցում մրցանակակիր, «Մոլեկուլային կենսաբանության ինստիտուտի» ավագ գիտաշխատող Գոհար Մկրտչյանը նշեց. «Ողջունելի է նման միջոցառումների կազմակերպումը։ Ես անցած տարի նույնպես մրցանակի եմ արժանացել «Գագիկ Ծառուկյան» հիմնադրամի կողմից»։

Գիտական լրագրության մրցույթի գլխավոր մրցանակակիր Լուսինե Վայաչյանը ցավով է նշում, որ պետության կողմից անհրաժեշտ ուշադրություն չի ցուցաբերվում գիտության նկատմամբ։ «Մասնավոր սեկտորը չէ, որ պետք է հովանավորի գիտությունը։ Շատ լավ է, որ «Տաշիր» հիմնադրամը, Կարեն Կարապետյանը, դրանից առաջ Գագիկ Ծառուկյանն ինչ-որ կերպ աջակցում են գիտությանը, բայց, համենայնդեպս, դա պետության գործն է»։

Նշենք, որ «Պահանջում ենք գիտության ֆինասնավորման ավելացում» նախաձեռնությունը գործում է արդեն մեկ տարուց ավել: Նախաձեռնությունը ստեղծված է գիտության տագնապային վիճակն ահազանգելու համար: Ֆեյսբուքյան Էջի մասնակիցները գիտակցում են, որ Հայաստանի կայուն եւ մրցունակ զարգացումը հնարավոր է միայն եւ միայն գիտության նկատմամբ կառավարության խորը հարգանքի եւ գնահատականի պայմաններում: