«Հայկական Ժամանակ». Ո՞վ է պատասխան տալու դատական համակարգը նման աղետալի վիճակում պահելու համար

Հայաստանի փաստաբանների կեսից ավելին երեկ դատերի չի ներկայացել և չի մասնակցել դատավարական գործողություններին՝ որպես բողոքի նշան ՀՀ վճռաբեկ դատարանի, փաստաբանների որակմամբ, հակասահմանադրական գործելաոճի դեմ:

ՀՀ վճռաբեկ դատարանի նախագահ Արման Մկրտումյւսնը փաստաբանների երեկվա գործադուլին այդպես էլ չի արձագանքել: Այս ատյանը փաստաբանների բողոքներին մինչ օրս անդրադարձել է մամուլի քարտուղարի և խորհրդականների մակարդակով միայն: Եվ Մկրտումյանը, և դատարանի անդամները հրաժարվում են պատասխանել փաստաբանների կողմից իրենց հասցեին բարձրաձայնած մեղադրանքներին: Արման Մկրտումյանը շուտով երևի ռեկորդ կսահմանի, քանի որ, իր 4 տարվա պաշտոնավարման ընթացքում, ընդամենը մեկ անգամ՝ 2009-ին է բարեհաճել ասուլիս հրավիրել և պատասխանել լրագրողների հարցերին: Փաստաբանները դեռևս չեն որոշել իրենց հետագա քայլերը: Ռուբեն Սահակյանի խոսքով, եղել է առաջարկ, որպեսզի փաստաբանները հաջորդ անգամ արդեն մեկ շաբաթով «գործադուլ» անեն: Փաստաբան Վահե Գրիգորյանն էլ չի բացառել, որ հաջորդ քայլով փաստաբանները կարող են նաև դատական համակարգի ղեկավարների հրաժարականը պահանջել:

«Դատավորի կողմից ցմահ իր պաշտոնը զբաղեցնելը չի կարող վարագույր հանդիսանալ, որպեսզի դրա ետևը դատավորն իր ապօրինություններն անի: Երբ փաստաբանը մի անգամ իր վստահորդի հանդեպ սխալվում է և դատապարտելի արարք է թույլ տալիս, անմիջապես նրան դատապարտում են: Տարիներ շարունակ համակարգն այս վիճակում է, ո՞վ է պատասխան տալու դատական համակարգը նման աղետալի վիճակում պահելու համար»,- ասել է Վահե Գրիգորյանը: