Փուչիկների պայթյունի գործով նախաքննությունը շարունակվում է

Մայիսի 4-ին Հանրապետության հրապարակում ՀՀԿ նախընտրական քարոզարշավի ընթացքում տեղի ունեցած պայթյունի գործով նախաքննությունը շարունակվում է: Այս մասին Լուրեր.com-ի հետ զրույցում ասաց Ոստիկանության հասարակայնության հետ կապերի և լրատվության վարչության աշխատակից Արմեն Մալխասյանը:

Հիշեցնենք, որ մայիսի 4-ին Հանրապետության հրապարակում Հանրապետական կուսակցության կազմակերպած զանգվածային միջոցառման ընթացքում բռնկվել էին գազով լցված փուչիկները, ինչի հետևանքով 154 մարդ, այդ թվում՝ երեխաներ, ստացել էին տարբեր աստիճանի այրվածքներ:

Նշենք, որ Սերժ Սարգսյանի հանձնարարությամբ մայիսի 16-ին Հայաստան էր հրավիրվել Գերմանիայի Հեյդելբերգ քաղաքի Համալսարանական կլինիկայի Պլաստիկ, վերականգնողական վիրաբուժության և այրվածքների կենտրոնի պրոֆեսոր Ադրիան Դայգլերը: Գերմանացի պրոֆեսորը վիրահատել էր փուչիկների պայթյունից տուժած երիտասարդներին:

Ինչպես ավելի վաղ հայտնել էր Լուրեր.com-ը, մեզ հետ զրույցում Երևանի պետական համալսարանի Քիմիայի ֆակուլտետի պրոֆեսոր Շիրազ Մարգարյանն ասել էր, որ եթե պայթյուն է տեղի ունեցել, ուրեմն փուչիկներում այրվող գազ է լցված եղել:

«Կամ ջրածին է եղել, կամ մեթան, կամ էլ գազերի խառնուրդ: Կարող էր նաև գազի լոկալ կուտակում լինել: Ե՛վ ջրածինը, և՛ մեթանը վտանգավոր են ու անթույլատրելի. երկուսն էլ նույն հետևանքները կունենային: Անվտանգ է ջրածնի ու հելիումի խառնուրդը՝ 4/1 հարաբերությամբ, սակայն դա օգտագործվում է աերոստատների (օդապարիկների) դեպքում՝ ծանրություն բարձրացնելու համար: Այս դեպքում ճիշտ կլիներ հելիում լցնել, որն իներտ գազ է»,- նշել էր Սարգսյանը:

Ավելացնենք նաև, որ երեկվա դրությամբ, Հանրապետության հրապարակում տեղի ունեցած պատահարից տուժածներից չորսը դեռ գտնվում են մայրաքաղաքի բժշկական հաստատություններում։ Այս մասին Լուրեր.com-ի հետ զրույցում ասացին ՀՀ Առողջապահության նախարարության մամլո ծառայությունից՝ նշելով, որ հիվանդների առողջական վիճակը գնահատվում է բավարար: