Եվրասիական դաշինք և ինտեգրացիա

Նոյեմբերի 18-ին Ռուսաստանի, Բելառուսի և Ղազախստանի նախագահները Մոսկվայում ստորագրել են հռչակագիր Եվրասիական տնտեսական ինտեգրացիայի համագործակցության վերաբերյալ, որը դիտվում է որպես ևս մեկ քայլ դեպի 2015 թ.-ին  Եվրասիական միության ստեղծմանը:

Համաձայնագրում մասնավորապես նշված է համագործակցող երկրների մաքսային միության ստեղծման հետագա քայլերը Միացյալ տնտեսական համագործակցության (ՄՏՀ) շրջանակներում: 

Ինչպես հաղորդում են Ռուսաստանի նախագահ Դմիտրի Մեդվեդևի մամլո ծառայությունից, ՄՏՀ-ն ձևավորվելու է Առևտրի համաշխարհային կազմակերպության (ԱՀԿ) շափանիշների և սկզբունքների հիման վրա, և կազմավորման ցանկացած փուլում յուրաքանչյուր պետություն կարող է միանալ այդ կառույցին: Ռուսաստանի նախագահը վստահություն է հայտնել, որ ստեղծվող դաշինքը պետք է զերծ մնա եվրոգոտում ստեղծված ֆինանսա-տնտեսական խնդիրներից:

Նախագծի հեղինակներն ընդգծում են, որ Եվրասիական տնտեսական համագործակցության շրջանակներում որոշումների ընդունման մեխանիզմը բացառում է որևէ անդամ երկրի գերիշխանությունը: Իսկ որոշումների ընդունման հիմնական մարմինը համարվում է Եվրասիական տնտեսական համագործակցության գերագույն խորհրդը՝ անդամ երկրների նախագահների և վարչապետների մակարդակով: Հաղորդում է «Ռիա Նովոստի» լրատվական գործակալությունը: