«Չորրորդ ինքնիշխանություն». ՀԱԿ-ը հաղթում է ֆեյսբուքյան քվեարկություններով

«ՉԻ» հաղորդմամբ՝ «Այս օրերին ֆեյսբուքյան հայկական տիրույթը ողողված է հարցումներով, որոնք վերաբերում են գալիք խորհրդարանական ընտրություններին։

Ո՞ր կուսակցությանն եք ձեր ձայնը տալու գալիք ընտրություններին. այսպիսի հարցադրում է արել ֆեյսբուքյան օգտատերերից մեկը, որի պատին ընթացող քվեարկության արդյունքներով առաջին տեղում ՀՀԿ–ն է, երկրորդ տեղում՝ ՄԻԱԿ–ը, երրորդ տեղում՝ ՀԱԿ–ը, ապա ԲՀԿ–ն։ Այս հարցումը դեռևս ընթանում է և դրա ամփոփման համար դեռևս ժամանակ կա։ Երեկ ամփոփվել է «ԼՈՒՐԵՐ.com» էլեկտրոնային կայքի՝ 10 օր տևած հարցախույզը։ Կայքն իր ընթերցողներին այսպիսի հարց էր առաջադրել. «Ո՞ր կուսակցությանը կտայիք ձեր ձայնը, եթե խորհրդարանական ընտրությունները լինեին այսօր»։ Այս հարցման շրջանակներում ամենաշատ տոկոսը հավաքել է ՀԱԿ–ը. հենց նա է գլխավորում ցուցակը՝ 27 տոկոս ձայնով, նրանից հետո 2-րդ տեղում ԲՀԿ–ն՝ 25 տոկոս ձայնով, ապա ՀՅԴ–ն՝ 17 տոկոսով, հետո՝ ՀՀԿ–ն՝ 16 տոկոսով։ 7-ական տոկոս են հավաքել «Ժառանգությունն» ու «Այլ կուսակցությունները»։ Ընդհամենը 1 տոկոս ձայն է հավաքել ՕԵԿ–ը։ Հարցմանը վերջին մեկ շաբաթվա ընթացքում կայքի տվյալներով մասնակցել է հինգ հազարից ավել մարդ»։