Հայոց լեզվից և գրականությունից աննախադեպ բարձր գնահատականներ են արձանագրվել

Թեստավորման եւ գնահատման կենտրոնի տվյալներով, այս տարի հայոց լեզվի և գրականության միասնական քննության միջին գնահատականը 13,9 է. սա վերջին տարիների համեմատությամբ բավականին բարձր գնահատական է. 2009-ին հայոց լեզվի և գրականության միջին գնահատականը եղել է 11,4, 2010-ին՝ 10,98:

Այս տարի աննախադեպ է նաև առավելագույն գնահատական' 20 բալ ստացած դիմորդների թիվը: Շուրջ 200 դիմորդ վաստակել է 20 միավոր, այն դեպքում, երբ 2008-ին նման գնահատական է ստացել 64, 2009-ին' 20, իսկ 2010-ին ընդամենը 2 դիմորդ:

Հայոց լեզվի և գրականության քննությանը հայտագրված 11795 դիմորդներից քննությանը մասնակցել են 11419-ը, 376 դիմորդ չի ներկայացել քննությանը: Քննություն հանձնած դիմորդներից 2680-ը կամ ընդհանուրի 23,5 տոկոսը վաստակել է 17,25-20 միավոր:

Դիմորդների 32,6 տոկոսը (3725 մարդ) ստացել է միջին գնահատական' 13,5-17,25:

Նվազագույն միավորներ' 7,5-13,25 բալ, հավաքել է 4379 դիմորդ (38,3 տոկոս):

Աննախադեպ է նաև կտրված դիմորդների թիվը' ընդամենը 635 կամ 5,6 տոկոս: Համեմատության համար նշենք, որ 2008-ին անբավարար էր ստացել դիմորդների 6 տոկոսը, 2009-ին'9,78 տոկոսը, 2010-ին' 10,89 տոկոսը: