Մենք ոչ մի որոշում չունենք այդ կապակցությամբ. Լևոն Զուրաբյանը` Երևանի ավագանու մանդատների մասին (տեսանյութ)

«Մենք ոչ մի բան չենք պահանջել, մենք ընդհանրապես ոչ մի որոշում չունենք այս կապակցությամբ: Ես հնչեցրել եմ դա որպես մի գաղափար, որն արժանի է քննարկման, բայց դեռևս չենք քննարկել այդ գաղափարը, որովհետև կան շատ ավելի առաջնահերթ հարցեր»,- այսօր հայտարարեց ՀԱԿ համակարգող Լևոն Զուրաբյանը՝ պատասխանելով Լուրեր.com-ի հարցին, թե արդյոք պահանջելո՞ւ են, որ «Հանրապետություն» և «Ազատ դեմոկրատներ» կուսակցությունների ներկայացուցիչները հրաժարվեն Երևանի ավագանու մանդատներից: Զուրաբյանը հավելեց, որ երբ առաջնահերթությունը գա այդ հարցին, միգուցե դա էլ կքննարկեն:

Հիշեցնենք, որ դեռ մայիսին Կենտրոնական ընտրական հանձնաժողովը պահանջեց Երեւանի ավագանու անդամությունից հրաժարվելու դիմումներ գրել Հայ ազգային կոնգրեսի համամասնական ցուցակով պատգամավոր ընտրված այն անձանցից, ովքեր 2009 թվականի ավագանու ընտրություններում Կոնգրեսի ցուցակի անցողիկ 13 տեղերում են եղել: Պահանջը նաեւ ՀԱԿ-ից հեռացած «Ազատ դեմոկրատներ» կուսակցության ղեկավար Խաչատուր Քոքոբելյանին է վերաբերվում, ով «Ժառանգության» ցուցակով ընտրվեց պատգամավոր: 

Այս անձանց ինքնաբացարկի պարագայում նրանց փոխարեն ավագանու մանդատները պետք է առաջարկվեն ՀԱԿ ավագանու ցուցակի 13-րդ հորիզոնականից հետո գտնվող հաջորդ հինգ հոգուն, որոնցից երեքը ՀԱԿ-ից դուրս եկած «Հանրապետություն» կուսակցության ներկայացուցիչներ Լյովա Եղիազարյանը, Նորիկ Եղիազարյանը եւ Արտակ Զեյնալյանն են: Վերջինս ավելի վաղ հայտարարել էր, որ «Հանրապետություն» կուսակցության անդամները կհրաժարվեն Երևանի ավագանու մանդատներից, եթե ՀԱԿ-ը դա նպատակահարմար համարի: