Արմեն Գեւորգյանն ընդունեց Ֆրանսիայի ներգաղթի եւ ինտեգրման գործակալության պատվիրակությանը

ՀՀ փոխվարչապետի, տարածքային կառավարման նախարարի պաշտոնակատար Արմեն Գեւորգյանն այսօր ընդունեց Ֆրանսիայի ներգաղթի եւ ինտեգրման գործակալության պատվիրակությանը` գլխավոր տնօրեն Ժան Գոդֆրուայի գլխավորությամբ: Հանդիպմանը ներկա էին նաեւ ՏԿՆ Միգրացիոն պետական ծառայության պետ Գագիկ Եգանյանը եւ Հայաստանում Ֆրանսիայի դեսպան Անրի Ռենոն:

Քննարկվեցին Հայաստանի եւ Եվրամիության միջեւ 2011թ. հոկտեմբերին ստորագրված «Շարժունակության շուրջ գործընկերության» վերաբերյալ համատեղ հռչակագրից բխող ծրագրերի իրականացման հարցեր: Եվրահանձնաժողովի կողմից Ֆրանսիայի ներգաղթի եւ ինտեգրման գործակալությանն է վերապահված «Շարժունակության շուրջ գործընկերության» շրջանակում «Միգրացիայի կառավարման ոլորտում Հայաստանի կարողությունների հզորացում, վերաինտեգրմանն ուղղված միջոցառումներ» նախաձեռնության իրականացումը:

Ա. Գեւորգյանը ողջունելով գործակալության ղեկավարի այցը` նշեց, որ ՀՀ կառավարությունը վերջին տարիներին հետեւողական ուշադրություն է դարձնում միգրացիայի ոլորտի բարեփոխումներին եւ շնորհակալություն հայտնեց եվրոպացի գործընկերներին` այդ գործընթացում աջակցության համար: Նա նաեւ առանձնահատուկ ընդծեց այս ոլորտում հայ-ֆրանսիական համագործակցության դրական փորձը: Անդրադառնալով ԵՄ հետ ստորագրված համատեղ հռչակագրին` Ա. Գեւորգյանը նշեց, որ հայկական կողմը բարձր է գնահատում միգրացիոն ոլորտում Եվրամիության հետ համապարփակ համագործակցությունը` դա համարելով ԵՄ հետ գործակցության կարեւոր ուղղություններից:

Ժան Գոդֆրուան ներկայացրեց «Միգրացիայի կառավարման ոլորտում Հայաստանի կարողությունների հզորացում, վերաինտեգրմանն ուղղված միջոցառումներ» ծրագրի մեկնարկին, ուղղություններին վերաբերող հարցեր: Նշվեց, որ մեկնարկը նախատեսվում է հոկտեմբերին: Եռամյա ծրագրի իրականացման նպատակով հոկտեմբերի 1-ից արդեն ԵՄ հովանու ներքո Երեւանում կբացվի Ֆրանսիայի ներգաղթի եւ ինտեգրման գործակալության գրասենյակը: Ծրագրի հիմնական ուղղությունները վերաբերելու են միգրացիոն հոսքերի կանոնակարգմանը, վերաինտեգրման խնդիրներին: Գործակալության ղեկավարը վստահություն հայտնեց, որ համատեղ ջանքերով այն հաջողությամբ կիրագործվի:

Ա. Գեւորգյանն իր կողմից օժանդակության պատրաստակամություն հայտնեց: Կողմերը քննարկեցին նաեւ ծրագրի մեկնարկին վերաբերող ընթացակարգային հարցեր: