Տիեզերքը գոյություն ունեցե՞լ է Մեծ Պայթյունից ավելի վաղ. հայ և բրիտանացի գիտնականներ

Օքսֆորդի համալսարանի պրոֆեսոր Ռոջեր Փենրոուզը (Roger Penrose) պնդում է, որ ինքը նկատել է Մեծ Պայթյունից առաջ տիեզերքի գոյության մասին խոսող վկայություն, հաղորդում է Daily Mail–ը։ Տիեզերքի ֆոնային միկրոալիքային ճառագայթման պատկերում նկատվել են համակենտրոն շրջաններ, որոնք կարող են վկայել, որ դրանք ծագում են ավելի վաղ ժամանակներից, քան տեղի է ունեցել «Մեծ Պայթյունը»։

Միկրոալիքային ճառագայթումը մեզ հնարավորություն է ընձեռում հպանցիկ հայացք նետել Տիեզերքի վիճակին իր կազմավորումից՝ Մեծ Պայթյունից 300.000 տարի անց, ինչը չնչին թիվ է՝ համեմատած նրա տարիքի հետ, որը գնահատվում է 13.7 միլիարդ տարի։

1988 թվականին Սթեֆըն Հոուքինգզի հետ համատեղ տիեզերքի մասին գիտելիքների հարստացման համար Wolf Prize-ի արժանացած Փենրոուզն իր այս ուսումնասիրության մեջ նոր վկայություններ է հավելում այն վարկածին, ըստ որի Տիեզերքը ծնվել (Մեծ Պայթյուն) և ոչնչացել է (Մեծ Սեղմում) բազմաթիվ անգամներ։

Այս հետազոտությունը պրոֆեսոր Փենրոուզն իրականացրել է հայազգի գիտնական, Երևանի պետական համալսարանի պրոֆեսոր Վահե Գուրզադյանի հետ համատեղ։ Նրանք ցույց են տվել, որ տիեզերական ֆոնային ճառագայթման անհամասեռությունները, հնարավոր է, պարունակում են նախորդ Տիեզերքից մնացած ճառագայթման հետքեր։

Նրանց խոսքերով, հայտնաբերվել են 12 համակենտրոն շրջաններ, որոնցից որոշներն ունեն մինչև 5 օղակ, ինչը կարող է նշանակել, որ նույն օբյեկտն իր պատմության ընթացքում ունեցել է 5 մեծ շրջափուլ։ Օղակները հանդիպում են գալակտիկական կուտակումներում, որոնց ֆոնային ճառագայթման բազմազանությունը զարմանալիորեն ցածր է։

Այս հետազոտությունը, հնարավոր է՝ հերքի Տիեզերքի ստեղծման «ինֆլյացիոն» տեսությունը, ըստ որի Տիեզերքը սկզբնավորվել է Մեծ Պայթյունով և կշարունակի ընդարձակվել այնքան, մինչև վերանան բոլոր տարրական մասնիկները։

Հայտնաբերված օղակները, հնարավոր է, լինեն նախորդ տիեզերաշրջանի վերջում գերծանր սև խոռոչների բախումների հետևանքով առաջ եկած գերհզոր գրավիտացիոն դաշտերի մնացորդային պատկերը, որը փոխանցվել է ներկա Տիեզերք։ Սա նշանակում է, որ տիեզերափուլերը կառավարվում են գերծանր սև խոռոչների միջոցով՝ տիեզերաշրջանի ավարտին ողջ տիեզերական նյութը կլանվում է գերծանր սև խոռոչների կողմից։

Այս նոր տեսության համաձայն, ամեն ինչի ավարտին մնում է միայն էներգիա, որն էլ առաջ է բերում նոր Մեծ Պայթյուն և նոր տիեզերաշրջան։

Նշենք, որ տիեզերական ֆոնային ճառագայթումը, ենթադրվում է, սառել է մինչև -270C-ի տիեզերքի գոյության 14 միլիարդ տարիների ընթացքում։ Աստղերն ու գալակտիկաները սկսել են կազմավորվել աշխարհի ստեղծումից 300 միլիոն տարի անց։ Մեր Արեգակը ծնվել է մոտ 5 միլիարդ տարի առաջ, իսկ Երկրագնդի վրա առաջին կյանքն առաջացել է մոտ 3.7 միլիարդ տարի առաջ։