«Երկիր». Կառավարությունը ուսուցիչներին «քցում» է

«Մինչ հրապարակային ելույթներում մեր պետական այրերը կարևորում են մանկավարժի դերը՝ չմոռանալով մեջբերումներ անել դասականների խոսքերից, երկրիս ղեկավարն էլ ընդամենը մեկ ամիս առաջ Ուսուցչի տոնին դիֆերամբներ էր ձոնում մանկավարժներին, վերջիններիս, ստացվում է՝ «տակից քցում են»։ 

Գեղարքունիքի մարզի, մասնավորապես՝ Մարտունու տարածաշրջանի հանրակրթական գրեթե բոլոր դպրոցները վերջին ամսիներին նախատեսվածից պակաս ֆինանսավորում են ստացել, միջին հաշվով՝ շուրջ 10 տոկոսով։ Այդ 10 տոկոսն էլ պահվում է ուսուցիչների դրույքաչափերից։ Դպրոցների տնօրեններից ոմանք ստիպված կրճատել են ոչ միայն ուսուցիչների՝ ըստ դասաժամերի հասանելիք աշխատավարձերը, այլև առհասարակ հանել մեթոդամիավորումների, արտաժամյա պարապմունքների համար տրամադրվող վարձատրությունը՝ հույս տալով, թե սա ժամանակավոր է։ Մարտունու մի շարք ուսուցիչներ և տնօրեններ ահազանգը փոխանցելով «Երկիր»-ին, միաժամանակ խնդրեցին անունները չհրապարակել՝ վախենալով զրկվել աշխատավարձից ընդհանրապես։ Նրանցից մեկն ասաց, որ իրենց դպրոցում անգամ նախորդ ամսվա աշխատավարձը չեն ստացել։

Ի դեպ, կամայականորեն ուսուցիչների աշխատավարձերից պահում անելու հրաման, ըստ մեր տեղեկությունների, ստացել են բոլոր դպրոցների տնօրենները»,- գրում է «Երկիր»–ը։