Օրական մոտ 25,000 դոլար չհարկվող եկամուտ է գոյանում միկրոավտոբուսներից. Արմեն Պողոսյան

Մեր մոտավոր հաշվարկներով՝ օրական մոտ 25.000 դոլար չհաշվարկված չհարկվող եկամուտ է գոյանում միկրոավտոբուսներից: Այսօր լրագրողների հետ հանդիպման ժամանակ նման հայտարարություն արեց Սպռողների միության նախագահ Արմեն Պողոսյանը: Նա անդրադարձավ հանրային տրանսպորտի ոլորտում առկա մի շարք խնդիրների. չկա հանրային տրանսպորտի մասին օրենք, տրանսպորտի զարգացման հայեցակարգում նշված դրույթները հայտնի չէ՝ երբ և ինչ միջոցներով են իրականացվելու, վարորդները ֆիքսված աշխատավարձ չունեն և այլն:

««Գծի տեր» հասկացությունը հանցավոր խմբերի կոդավորված լեզուն է: Ո՞վ չգիտի, որ գծի տեր կարող են լիենլ ԱԺ պատգամավորներ, պաշտոնյաներ: Այդ մի քանի մարդիկ թելադրում են խաղի բոլոր կանոնները: Տասնհինգ հոգի է բավարաված, իսկ մնացած մեկուկես միլիոնը տառապում է: Մենք կուզենայինք՝ ամեն ինչը հստակ ու թափանցիկ լինի»,- նշեց Պողոսյանը:

Նրա համոզմամբ՝ հանրային տրանսպորտի ոլորտում կոռուպցիոն ռիսկեր կան: Ըստ Պողոսյանի՝ տրանսպորտը մի առանձնահատուկ ձեռնարկատիրության ձև է, որտեղ ամենահարվամարվետն է ստվերային գործունեություն իրականացնել ու եկամուտներ ստանալ:

Արդեն շուրջ մեկ տարի է՝ գործում է «Արժանապատիվ տրասնպորտ» նախաձեռնությունը, որի նպատակը հանրային տրանսպորտի ոլորտում առկա խնդիրներին լուծում տալն է: Նախաձեռնության ներկայացուցիչ Արման Ղարիբյանն ասաց, որ պետք է մշակել հստակ ռազմավարություն, որը կբերի նրան, որ կունենանք արժանապատիվ տրանսպորտ:

«Ամեն միջոց գործի ենք դնելու: Ստեղծել ենք աշխատանքային խումբ, որտեղ ներգրավված են նաև իրավաբաններ: Հույս ունենք՝ վարորդներն էլ մեզ կմինանան»,- նշեց նա:

Այսօր նախաձեռնությունը հայտարարություն է տարածել, որին միացել են մի շարք կազմակերպություններ: Հայտարարությունում մասնավորապես ասված է. «Մենք՝ ներքոստորոգրյալներս, հայտարարում ենք, որ հետայսու ծավալելու ենք նպատակաուղղված և հետևողական պայքար քաղաքային տրանսպորտի ոլորտում առկա խնդիրները վեր հանելու և լուծելու ոլորտում օրինականություն և կարգուկանոն հաստատելու համար»: