Հայոց ցեղասպանության հարցի քննարկումը տեղափոխվել է Քնեսեթի Կրթության հարցերով հանձնաժողով

Հունիսի 12–ին Իսրայելի խորհրդարանի՝ Քնեսեթի լիագումար նիստում Հայոց ցեղասպանության 97–րդ տարելիցի կապակցությամբ քննարկում տեղի ունեցավ։ Քննարկման առաջարկությունն արել էր «Meretz» կուսակցությունը ներկայացնող պատգամավոր Զավահա Գալյոնը։ 

Քնեսեթի խոսնակ Ռիվեն Ռիվլինը հայտարարել է, որ Իսրայելի բարոյական պարտքն է հիշել թուրքերի կողմից 1.5 միլիոն հայերի կոտորածը, սակայն նշել է, որ այդ հարցը պետք չէ քաղաքականացնել։ Ռիվլինը նաև ավելացրել է՝ «հրեաների ողջակիզման կազմակերպիչները հույս ունեին, որ աշխարհը լուռ կմնա հրեաների ջարդերի վերաբերյալ, ինչպես դա եղել է հայերի դեպքում»։ 

Քնեսեթի 7 կուսակցությունների ներկայացուցիչները կողմ են արտահայտվել Հայոց ցեղասպանության ճանաչմանը։ Քննարկումներին մասնակցել են նաև Իսրայելի կառավարության անդամներ։ Իսրայելի բնապահպանության նախարար Կիլատ Էրտան իր հերթին նշել է, որ Իսրայելի կառավարությունը սկզբունքորեն դեմ չէ Հայոց ցեղասպանության ճանաչմանը և «հույս ունի, որ հարցի շուրջ քննարկումները կշարունակվեն»։

Քննարկման վերջում որոշում է կայացվել Հայոց ցեղասպանության ճանաչման վերաբերյալ հարցի քննարկումը շարունակել Քնեսեթի Կրթության հարցերով հանձնաժողովում։

Ինչպես հաղորդում է «Ասպարեզ» թերթը, Քնեսեթի Կրթության հանձնաժողովի նախագահի պաշտոնը վերջերս ստանձնել է Իսրայելի «Անկախություն» կուսակցության անդամ Անատ Ուիլֆը, ով հայանպաստ դիրքորոշում ունի Հայկական հարցի վերաբերյալ։