ԼՂՀ Ազգային ժողովի պատվիրակությունը՝ Մեծ Բրիտանիայում

Հունիսի 11-ից ԼՂՀ պաշտոնական պատվիրակությունը՝ Ազգային ժողովի նախագահ Աշոտ Ղուլյանի գլխավորությամբ, գտնվում է Մեծ Բրիտանիայի եւ Հյուսիսային Իռլանդիայի Միացյալ Թագավորության մայրաքաղաք Լոնդոնում: Պատվիրակության կազմում են մշակույթի եւ երիտասարդության հարցերի նախարար Նարինե Աղաբալյանը, արտաքին գործերի նախարարության բազմակողմ հարաբերությունների վարչության պետ Արմինե Ալեքսանյանը:

Պատվիրակությունը Լոնդոն է ժամանել հայ-բրիտանական բարեկամության խորհրդարանական բազմակուսակցական խմբի հրավերով. տեղեկացնում է ԼՂՀ ԱԺ մամուլի ծառայությունը:

Այցի առաջին աշխատանքային օրը Միացյալ Թագավորության Լորդերի պալատում ԼՂՀ պատվիրակությունը մասնակցել է հայ-բրիտանական բարեկամության խմբի տարեկան ժողովին, որն այս տարի հոբելյանական էր' ի նշանավորումն խմբի կազմավորման 20-ամյակի: Բացելով հանդիպումը՝ հայ-բրիտանական բարեկամության խմբի ղեկավար բարոնուհի Քերոլայն Քոքսը ողջունել է Արցախի ներկայացուցիչներին եւ իր տպավորությունները ներկայացրել վերջերս Արցախ կատարած այցելությունից:

Պատասխան խոսքում Արցախի խորհրդարանի նախագահ Ա. Ղուլյանը ողջունել է բրիտանացի խորհրդարանականներին եւ շնորհակալություն հայտնել նրանց' Արցախի ժողովրդի հոգսերով ապրելու, երիտասարդ հանրապետությանն ըստ ամենայնի աջակցելու եւ տարբեր ծրագրերի իրականացման գործում իրենց ներդրումը բերելու համար: Այնուհետեւ նա բրիտանացի խորհրդարանականներին ներկայացրել է Արցախի Հանրապետության քսան տարիների ձեռքբերումներն ու հաջողությունները' պետականաշինության, տնտեսական զարգացման եւ ժողովրդավարական արժեքների արմատավորման ու ամրապնդման գործում, Ղարաբաղյան հիմնախնդրի կարգավորման ներկա փուլի ու հնարավոր զարգացումների մասին ղարաբաղյան կողմի տեսակետները, նաեւ պատասխանել է ներկաների հարցերին:

Հունիսի 12-ին ԼՂՀ Ազգային ժողովի նախագահ Աշոտ Ղուլյանը ելույթ է ունեցել Լոնդոնի համալսարանի Արեւելքի եւ Աֆրիկայի ուսումնասիրությունների ինստիտուտում' «Կովկասում կայունության եւ առաջընթացի հեռանկարները. խաղաղությունը եւ պետականաշինության գործընթացը Լեռնային Ղարաբաղում» թեմայով:

Այնուհետեւ ԼՂՀ Ազգային ժողովի նախագահ Աշոտ Ղուլյանի պատվին, Միացյալ Թագավորությունում ՀՀ դեսպանի մասնակցությամբ, Մեծ Բրիտանիայում Հայ Առաքելական Եկեղեցու թեմակալ առաջնորդ Վահան եպիսկոպոս Հովհաննիսյանի նախաձեռնությամբ, կազմակերպվել է ընդունելություն, որին հրավիրված են եղել բրիտանահայ կառույցների ղեկավարները: ԼՂՀ պատվիրակության անդամներն իրենց խոսքում կարեւորել են Սփյուռքի հայկական կազմակերպությունների համակողմանի աջակցությունը, ինչի շնորհիվ Արցախը հաջողությամբ դիմագրավում է ներկա մարտահրավերները, եւ շեշտադրել են դրանք շարունակելու անհրաժեշտությունը:

Պատվիրակության այցը Լոնդոն շարունակվում է: