«Հայկական Ժամանակ». Հայաստանում կան մարդիկ, ովքեր վաճառում են իրենց երիկամը

Հայաստանում դեռ կան մարդիկ, ովքեր վաճառում են իրենց երիկամը՝ համապատասխան կայքերում համապատասխան հայտարարություններ տհդադրելով: Այդ քայլին նրանց դրդում են սոցիալական ծանր վիճակը և բարեկեցիկ կյանքով ապրելու ձգտումը:
Սահմանված գները նկատելիորեն տարբեր են՝ 15 հազար ԱՄՆ դոլարից մինչև 45 հազար ԱՍՆ դոլար: Օրենքը, սակայն, արգելում է օրգանների առքուվաճառքը, ինչը նշանակում է, որ նման գործարքի իրականացման համար զարտուղի ճանապարհներ պետք է որոնվեն:

«ՀԺ»—ն նշում է, որ երիկամի փոխպատվաստում Հայաստանում կատարվում է: «Արաբկիր» բժշկական կենտրոնի բժշկուհի Հելեն Նազարյանը թերթի թղթակցի հետ զրուցում ասել է, որ տարեկան այդպիսի 10-12 փոխպատվաստում է իրականացվում: ՀՀ քաղաքացիների համար, ըստ նրա, դա արժե 2 միլիոն 500 հազար դրամ: Ոչ ՀՀ քաղաքացիների դեպքում՝ երիկամի փոխպատվաստումը կատարվում է 5 միլիոն կամ 7,5 միլիոն դրամով: Ցածր գինը գործում է այն հիվանդների համար, որոնք ՀՀ քաղաքացի չեն, բայց ազգությամբ հայ են: