Հունիսի 14-ը Արյան դոնորի համաշխարհային օրն է

Հասարակություն 14 Հունիս, 2012 10:15

Հունիսի 14-ը Արյան դոնորի համաշխարհային օր է հաստատվել 2005թ. Ժնևում, Առողջապահության համաշխարհային ասամբլեայի նստաշրջանում՝ ի պատիվ ավստրիացի բժիշկ Կարլ Լանդշտեյների, որը 1930թ. Նոբելյան մրցանակ է ստացել մարդու արյան խմբերի հայտնաբերման համար։
Մարդուց մարդուն արյուն առաջին անգամ փոխներարկվել է 1819թ. Անգլիայում: Ներկայումս այն լայնորեն կիրառվում է վիրաբուժության, մանկաբարձության, գինեկոլոգիայի, այրվածքաբանության, վերակենդանացման և արյունաբանության ոլորտներում: Ժամանակին իրականացված արյան բաղադրամասի փոխներարկումը հաճախ կյանքեր է փրկում:

Հայաստանում տարեցտարի ավելանում է հավաքագրվող արյան քանակը: Այսպես, եթե 2000-2001թթ. տարեկան իրականացվում էր մոտ 6000-7000 արյունատվություն, ապա 2010թ. կատարվել է մոտ 15,000 արյունատվություն, և այս թիվն աճում է։

Սակայն արյան բաղադրամասերով և պատրաստուկներով երկրի պահանջարկն ապահովելու համար Հայաստանում, ելնելով բնակչության քանակից, անհրաժեշտ է իրականացնել 60,000 արյունատվություն:

Հայաստանում ներկայումս արյան դոնորների կազմում գերակշռում են կադրային դոնորները, մինչդեռ առավել անվտանգ խումբ են կազմում անվարձահատույց կամավոր դոնորները, որոնք Հայաստանում կազմում են մատ 7%: Այս խնդրի լուծումն անհատույց կամավոր դոնորության քարոզչությունն է հասարակության լայն շրջաններում, հատկապես երիտասարդության մեջ:

Այսօր Հայաստանի երիտասարդական հիմնադրամը և ՀՀԿ երիտասարդական կազմակերպությունը կազմակերպում են անվարձահատույց արյունատվության ակցիա, որին կմասնակցեն տարբեր բուհերի ուսանողներ, ինչպես նաև երիտասարդական հասարակական կազմակերպությունների ներկայացուցիչներ: Ակցիան նպատակ ունի հասարակության մեջ արմատավորել այն գաղափարը, որ մեր հանձնած արյան շնորհիվ հնարավոր կլինի փրկել մարդկանց կյանքեր: Շատ կարևոր է, որ այս գաղափարը սերմանվի քաղաքացիների մեջ հնարավորինս վաղ հասակից:

Արյունատվությունը համարվում է առողջ ապրելակերպի գրավականներից մեկը։ Նշվում է, որ այն ազդեցություն է թողնում դոնորի առողջության վրա: