Ոչ ոք չի կարող բացատրել, թե ինչով է պայմանավորված միակ մանկական ալիքի փակումը Հայաստանում. Մ. Մարգարյան

Հունիսի 18-ին Արամ Խաչատրյան համերգասրահում կկայանա «Տաղանդավոր սերունդ» անվանումը կրող Ազգային երկրորդ մանկական մրցանակաբաշխությունը: Ամենամյա այս միջոցառումը կամփոփի երեք ոլորտ՝ մշակույթ, սպորտ, կրթություն: Ինչպես նշեց մրցանակաբաշխության կազմակերպիչ Միքայել Մարգարյանը՝ «Մրցանակաբաշխությունը ժյուրի չի ունենալու։ Այստեղ պարգևատրվելու են ինչպես Հայաստանի այնպես էլ սփյուռքի մինչև 16 տարեկան երեխաները և պատանիները միջազգային ասպարեզում ունեցած նվաճումների համար, ինչպես նաև այն կազմակերպությունները, որոնք իրենց ներդրումն են ունեցել երեխաների ունեցած հաջողություններում»: Միջոցառման հատուկ հյուրը ուկրաինահայ երգիչ, միջազգային մրցույթների դափնեկիր, «Նոր ալիք» երգի մրցույթի 2011թ-ի հաղթող Անդրանիկ Ալեքսանյանն էր: Հեռուստաընկերությունը, որով կհեռարձակվի մրցանակաբաշխությունը, դեռևս հայտնի չէ:

Այն հարցին, թե ինչով է պայմանավորված հեռուստաընկերությունների անտարբերությունը, և ինչու միջոցառումը մեծ մասսայականություն չի վայելում, Միքայել Մարգարյանը պատասխանեց. «Անհասկանալի է, ոչ ոք չի կարող բացատրել, թե ինչով է պայմանավորված միակ մանկական ալիքի փակումը Հայաստանում։ Այսօր դուք չեք կարող բացատրել, թե ինչու հեռուստաընկերությունների 90% չունեն անգամ մանկական հաղորդում: Ինչո՞վ է բացատրվում այն, որ իմ երեխաները հեռուստատեսությամբ նայելու բան չունեն, և ես ստիպված եմ ամերիկյան, եվրոպական կամ ռուսական տեսանյութեր տալ երեխաներին՝ նայելու: Եթե մենք գտնենք դրանց պատասխանները, հավանաբար մեր պատասխանն էլ կգտնենք դրա մեջ»: