Երկու գալակտիկաները միացել են ջրածնային կամրջով

«Գրին-Բենք» աստղադիտարանի աստղագետները հայտնաբերել են Անդրոմեդայի և Եռանկյունու գալակտիկաները միավորող ջրածնային ամպ։ Հայտնագործությունը ներկայացվել է Ամերիկյան աստղագիտական ընկերության 220-րդ ժողովի ընթացքում, հայտնում է ScienceNow-ն։

Աստղագետների խոսքերով՝ Անդրոմեդայի (M31) և Եռանկյունու (M33) գալակտիկաները հնում մերձեցել են բավականին մոտ տարածության վրա, ինչը հանգեցրել է նրան, որ ընդհանուր գրավիտացիայի ազդեցությամբ սառը ջրածնային ամպերը տեղափոխվել են երկու գալակտիկաների միջակայք։ Հետագայում վերջիններս հեռացել են, սակայն միջգալակտիկական գազի ամպերը մնացել են իրենց տեղում։

Առաջին անգամ ընդհանուր ջրածնային ամպերի գոյության վերաբերյալ տեսակետ հայտվել է 2004 թվականին դանիական դիտակով արված դիտումների հիման վրա։ Դրանք հնարավոր է եղել հաստատել ԱՄՆ-ի «Գրին-Բենք» ռադիոդիտակով արված դիտումների շնորհիվ, ինչը թույլ է տվել տեսնել ջրածնային կամրջի կառուցվածքի ավելի նուրբ մանրամասները։ Դրանցում գազը հավաքվել է մի քանի հազար լուսատարի տրամագծով ամպերում։

«Գրին-Բենք» դիտակը աշխարհում ամենամեծ լրապոտույտ պարաբոլական դիտակն է, որի տրամագիծը կազմում է 100 մետր։ Այն նաև մարդու կողմից ստեղծված խոշորագույն վերգետնյա շարժական կառույցն է։

Վերջերս, «Հաբլ» դիտակի շնորհիվ հնարավոր է դարձել ճշտել Անդրոմեդայի և մեր սեփական՝ Ծիր Կաթին գալակտիկաների ապագա բախման ժամանակը։ Այն տեղի կունենա մոտավորապես 4 միլիարդ տարի հետո։ Ըստ հաշվարկների, կա մեծ հավանականություն (մոտ 9 տոկոս), որ Ծիր Կաթինը կբախվի Եռանկյունու գալակտիկային ավելի վաղ, քան նույնը տեղի կունենա Անդրոմեդայի գալակտիկայի հետ։