Մեկ քայլ ևս, և կհայտնվեք աղբամանում

Աղբահանությունն այսօրվա ամենացավոտ խնդիրներից է։ Երևանի քաղաքապետարանը որքան էլ խոսում և որոշումներ է ընդունում հարցը կարգավորելու ուղղությամբ, միևնույն է՝ փողոցներով շրջելիս հասկանալի է դառնում, որ այս դեպքում ևս խոսքը գործի այդպես էլ չի վերածվում։

Քաղաքապետարանի և թաղապետարանների կողմից Երևան քաղաքի տարբեր հատվածներում տեղակայված են աղբամաններ, որոնք շատ հաճախ չեն ծառայում իրենց նպատակին։ Հիմական պատճառներից են բնակչության անբարեխիղճ վերաբերմունքը, և աղբամանների ոչ ճիշտ տեղակայված լինելը։

Երբեմն աղբամաններին հասնելու և աղբը թափելու համար մարդկանց հարկ է լինում բավականին երկար ճանհապար կտրել-անցնել, ինչը մարդիկ հաճախ զլանում են անել, կամ երբեմն էլ՝ դժվարանում։

«Սասունցի Դավիթ» փողոցում ականատես եղանք, թե ինչպես են աղբամանները տեղադրված անմիջապես անցումի դիմաց, որի պատճառով մարդիկ քիչ է մնում քայլեն դրանց միջով։ Անցորդներից մի տղամարդ Lurer.com-ին տված հարցազրույցում նշեց. «Շատ անհարմար վայրում են աղբամանները, եթե աղբամաններն այստեղ պետք է մնան, ավելի լավ է՝ անցումը տեղափոխեն մեկ այլ տեղ»։

Աղբամանները ոչ ինտեսիվ մաքրելու պատճառով ամառվա այս թեժ շոգին նրանց «բուրմունքը» մարդկանց ստիպում է հեռվից շրջանցել։ Իսկ ի՞նչ կարող են անել այն շենքերի բնակիչները, որոնց բակերում տեղադրված են գրեթե երբեք չմաքրվող աղբամաններ։

Էրեբունի համայնքի բնակիչներից մեկը Lurer.com-ի հետ զրույցում հույս հայտնեց, որ գոնե ամռան շոգ եղանակին իրենք ակնկալում են այս խնդրի նկատմամբ իրավասու մարմինների ուշադրությունը, քանի որ ամռանն է՛լ ավելի է ահագնանում հիվանդությունների ու համաճարակների վտանգը։ Նշենք նաև, որ բացի ամառվա շոգ եղանակից, նրանք պարտավոր են տարվա բոլոր եղանակներին հետևել մայրաքաղաքի մաքրությանը։