Արա Սադոյանի գլխավորած պատվիրակության աշխատանքային այցը Բուդապեշտ և Բարսելոն

Երևանի Կենտրոն վարչական շրջանի ղեկավար Արա Սադոյանի գլխավորած պատվիրակությունը մայիսի 31-ից հունիսի 8-ն աշխատանքային այցով գտնվում էր Բուդապեշտում և Բարսելոնում:

Հունգարիայի մայրաքաղաք Բուդապեշտում Արա Սադոյանի գլխավորած պատվիրակությունը մասնակցեց միջազգային ամառային երաժշտական փառատոնին, որին մասնակցում են աշխարհի մի շարք պետություններ: Հայկական պատվիրակությունը հանդիպումներ ունեցավ նաև քաղաքային իշխանությունների ներկայացուցիչների, Հունգարիայի հայկական համայնքի ղեկավար Ալեքս Ավանեսյանի հետ: Հանդիպման ընթացքում կողմերը քննարկեցին երկկողմ համագործակցության ընդլայնման ծրագրեր, երկու քաղաքների միջև կրթական, մշակութային և այլ ոլորտների փորձի փոխանակման հարցեր:

Այնուհետև պատվիրակությունը մեկնեց Իսպանիայի Բարսելոն քաղաք: Աշխատանքային այցի ընթացքում հայկական պատվիրակությունը հանդիպումներ ունեցավ Բարսելոնի քաղաքապետարանի միջազգային հարաբերությունների վարչության տնօրեն Միգել Մարտիի, Բարսելոնի Եյշամպլա (Կենտրոն) վարչական շրջանի ղեկավար Ժերարդ Արդանիի և Բարսելոնի Նոու Բարիս վարչական շրջանի ղեկավար Իռմա Ռոգնոնի հետ:

Հանդիպման ընթացքում Արա Սադոյանն իսպանական կողմի քննարկմանը ներկայացրեց Իսպանիայի Բարսելոն քաղաքի և Հայաստանի Հանրապետության մայրաքաղաք Երևանի Կենտրոն վարչական շրջանի միջև համագործակցության ծրագրի նախագիծը:

Արա Սադոյանը ներկայացրեց իր ղեկավարած կառույցը, տեղեկացրեց Երևանի քաղաքապետարանի և Կենտրոն վարչական շրջանի կողմից իրականացվող բարեփոխումների ծրագրերի մասին՝ առանձնահատուկ ուշադրություն հրավիրելով աղբահանության, լուսավորման և զբոսաշրջության զարգացման առավել բարենպաստ պայմանների ստեղծմանն ուղղված միջոցառումներին, որոնց շրջանակներում կարևորվեց իսպանական կողմի հետ փորձի փոխանակման հնարավորությունն ու ծանոթացումը Բարսելոնում գործող մոդելներին:

Բարսելոնի Կենտրոն համայնքի ղեկավարը, ողջունելով հայկական կողմի առաջարկը, պատրաստակամություն հայտնեց առաջարկը քննարկել Բարսելոնի քաղաքապետարանում և համապատասխան մոդելներ տրամադրել հայկական կողմի քննարկմանը:

Հանդիպման ընթացքում հայկական պատվիրակությունը կարևորեց նաև կրթական և մշակութային ոլորտներում փորձի փոխանակումը՝ առաջնայնություն տալով նախակրթարանների կառուցվածքային կազմակերպման և ղեկավարման Բարսելոնի քաղաքապետարանի Կենտրոն համայնքի փորձին: Առաջարկ եղավ նաև վարչական շրջանների երաժշտական դպրոցների մասնագիտական փոխանակման ծրագիր մշակել և երկկողմ քննարկումից հետ այն կիրառել երկու քաղաքների Կենտրոն վարչական շրջաններում:

Արա Սադոյանը, շնորհակալություն հայտնելով նման հնարավորության ընձեռման համար, իր հերթին առաջարկեց Բարսելոնն ու Երևանը ճանաչել քույր քաղաքներ և համապատասխան անվանակոչմամբ պուրակներ հիմնել ինչպես Երևանում, այնպես էլ Բարսելոնում: Առաջարկը հավանության արժանացավ իսպանական կողմից:

Ի դեպ, նման առաջարկով Կենտրոն վարչական շրջանի ղեկավարը հանդես էր եկել նաև Բուդապեշտում, ինչը նույնպես արժանացել էր հավանության:
Արա Սադոյանի գլխավորած պատվիրակությունը հանդիպում ունեցավ նաև Բարսելոնի քաղաքապետարանի ներկայացուցիչների հետ: Հանդիպման ընթացքում քննարկվեցին Երևանի բարեփոխմանն ուղղված ծրագրեր, առանձնահատուկ կարևորվեց աղբահանության խնդիրը: Իսպանական կողմը պատրաստակամություն հայտնեց Երևանի քաղաքապետարանին փոխանցել քաղաքապետարանի հսկողության տակ գտնվող մոդելը:
Հանդիպման ավարտին Արա Սադոյանը, շնորհակալություն հայտնելով ջերմ ընդունելության համար, վստահեցրեց, որ այցն արդյունավետ էր, և մոտ ապագայում տեսանելի կլինեն երկկողմ համագործակցության եզրերը: