Հրայր Մանուկյանի պարզաբանումը «Կոնրադ Ադենաուեր»-ի հերքման վերաբերյալ

Սույն թվականի հունիսի 13-ին «Կոնրադ Ադենաուեր» հիմնադրամի կողմից ներկայացված մեղադրանքների եւ հերքման պահանջի վերաբերյալ Լուրեր.com-ը հրապարակում է նաեւ Հրայր Մանուկյանի պարզաբանումը.

«Նախ՝ նկարը ես նկարողի թույլտվությամբ եմ տրամադրել lurer.com-ին: Երկրորդ՝ որպեսզի «Կոնդրադ Ադենաուեր» հիմնադրամի Հայաստանի ներկայացուցչությունը որոշեր՝ իմ ասածները համապատասխանու՞մ են միջոցառման բովանդակությանը, թե՞ ոչ, ես պետք է այդ բովանդակության վերաբերյալ որևէ բան ասած լինեի: Բայց այդ բովանդակության վերաբերյալ ես ոչինչ չեմ ասել, քանի որ այդպիսի հարց ինձ չի ուղղվել: Հարցերը վերաբերել են հայ-ադրբեջանցի շփման հարթությանը, և ես դրանց պատասխանել եմ՝ միջոցառման պաշտոնական մասից դուրս եղած անձնական շփումներիս հիման վրա: Այնպես որ, անհասկանալի է, թե ինչն է հերքել «Կոնրադ Ադենաուեր» հիմնադրամի Հայաստանի ներկայացուցչությունը: Այն, թե ես ինչ եմ զրուցել ադրբեջանցիների հե՞տ: Պարզապես ծիծաղելի է: Վստահ եմ, որ Հիմնադրամի հայաստանյան ներկայացուցչության՝ lurer.com-ին ուղարկված այդ տեքստը որևէ առնչություն չունի «Կոնրադ Ադենաուեր» հիմնադրամի ղեկավարության մոտեցումների ու տեսակետների հետ:

Միաժամանակ, շնորհակալություն եմ հայտնում «Կոնդրադ Ադենաուեր» հիմնադրամին՝ նման միջոցառումներ կազմակերպելու համար, որը երիտասարդ քաղաքական գործիչներիս գիտելիքներ ու հմտություններ տալուց բացի՝ հնարավորություն է ընձեռում հաղորդակցվել տարածաշրջանի մեր գործընկերների հետ»:

Հիշեցնենք, որ սույն թվականի հունիսի 12-ին Լուրեր.com-ը հարցազրույց էր հրապարակել հունիսի 3-8-ը Թբիլիսիում «Փոխակերպելով քաղաքականությունը» թեմայով սեմինարին Հայաստանը ներկայացրած երիտասարդներից Հրայր Մանուկյանի հետ: Սեմինարը կազմակերպել էր «Կոնրադ Ադենաուեր» (Konrad Adenauer) հիմնադրամը: