«Հրապարակ». Միասին խախտել են ՀՀ պաշտոնական լեզվի մասին օրենքը

ԵԱՀԿ գործող նախագահ էմոն Գիլմորի հետ խորհրդարանական կուսակցությունների հանդիպումը հայերենով բացելով՝ Աժ արտաքին հարաբերությունների հանձնաժողովի նախագահ Արտակ Զաքարյանն այնուհետև խոսքը փոխանցել է Աժ ԲՀԿ ներկայացուցիչ Վարդան Օսկանյանին: Վերջինս շատ արագ և առոգանությամբ սկսել է խոսել Ղարաբաղից և ընտրություններից՝ անգլերենի իր փայլուն իմացությամբ զարմացնելով պարոն Գիլմորին: Կառուցողական ընդդիմությունից չի ցանկացել հետ մնալ արմատական ընդդիմության ներկայացուցիչ Լևոն Զուրաբյանը. նա ևս խոսել է ընտրությունների «կեղծված» արդյունքներից և բանտարկված ՀԱԿ ակտիվիստներից: Դարձյալ անգլերենով: Պառլամենտական մեծամասնության ներկայացուցիչ Արտակ Զաքարյանը, տեսնելով, որ «իրավիճակը դուրս է գալիս վերահսկողությունից», ասել է, որ բոլոր երկրներում էլ ընդդիմության գործն իշխանություններից բողոքելն է: Դարձյալ անգլերենով: Արդյունքում բոլորով միասին խախտել են ՀՀ պաշտոնական լեզվի մասին օրենքը: