Տաս կայքերում ամենից շատ լուսաբանվել են ՀՀԿ-ն, ՀԱԿ-ը և ԲՀԿ-ն

«Լրագրողներ հանուն ապագայի» հասարակական կազմակերպության նախագահ Սուրեն Դեհերյանն այսօր լրագորղների հետ հանդիպման ժամանակ ներկայացրեց հայկական տաս առցանց ԶԼՄ-ների կողմից 2012թ. մայիսի վեցի խորհրդարանական ընտրությունների լուսաբանման մշտադիտարկման հաշվետվությունը:

Մշտադիտարկվել են տաս առցանց ԶԼՄ-ներ՝ 1in.am, 7or.am, A1plus.am, Azatutyun.am, Civilnet.tv (am), Lragir.am, News.am, Tert.am, Panarmenian.net, Panorama.am: Կայքերի ընտրությունը կատարվե է circle.am վարկանիշային համակարգի տվյալների և մեդիա փորձագետների շրջանակում կատարված հարցման արդյունքում: Արձանագրվել են այդ կայքերի Լրահոս, Քաղաքական, Տեսադարան բաժիններում առկա բոլոր այն հրապարակումները, որոնք անդրադարձ են պարունակել համամասնական ընտրակարգով գրանցված 9 կուսակցությունների և դրանցից յուրաքանչյուրի համամասնական ընտրացուցակի առաջին երեք անձանց:

Ընդհանուր առմամբ, տասը առցանց ԶԼՄ-ներում 2012թ. ապրիլի ութից մինչև մայիսի քսանը արձնագարվել և մշտադիտարկվել է 8,156 հրապարակում, որտեղ կուսակցությունները հիշատակվել են 18,288 անգամ: Ընդ որում, քարոզարշավի ավարտից հետո, մայիսի հինգից մինչև մայիսի քսանը ներառյալ, եղել է ընդամենը 2,787 հրապարակում և համապատասխանաբար 6,902 անդրադարձ կուսակցություններին (դաշինքնին):

Բոլոր տասը կայքերի քանակական ցուցանիշների տեսանկյունից անդրադարձների ընդհանուր քանակով առաջատար եռյակում են ՀՀԿ-ն, ՀԱԿ-ը և ԲՀԿ-ն:
Առցանց լրատվամիջոցներում առկա հրապարակումների անդրադարձների 68,7%-ը կուսակցություններին (դաշինքին) կրել է չեզոք, 7,6%՝ դրական և 23,8%-ը բացասական բնույթ: