Ես քո նման 100 դրամանոց քիլեր չե՛մ

Երևան քաղաքի տրանսպորտային կանգառների վիճակը շարունակում է մնալ մեր և հանրության ուշադրության կենտրոնում։ Քաղաքապետարանը որոշակի բարեփոխումներ իրականացրել է. Երևանի մոտ 300-ից ավել կանգառներում գործունեությունը կարգավորելու համար ռետինե արհեստական բարձակներ են կիրառվել և համապատասխան գծանշմամբ առանձնացվել են կանգառագոտիները, վերանորոգվել են կանգառանշանները, բարելավվել դրանց արտաքին տեսքը։

Իսկ ծանրաբեռնված 60 կանգառներում տեղադրվել են տեսախցիկներ, որոնք 24 ժամ վերահսկում են երթևեկությունը։ Բայց հարկ է նշել, որ չնայած մի շարք կատարված բարեփոխումների՝ կանգառներում շարունակվում է քաոսային իրավիճակը։

Քաղաքի որոշ հատվածներում կարելի է հանդիպել երթուղայինների, որոնք իրենց վերջին կայանատեղին դարձրել են հասարակական տրանսպորտին պատկանող կանգառները՝ խոչընդոտելով նորմալ երթևեկությանը։

Միաժամանակ, որոշ վարորդներ շարունակում են «պատերազմել» ուղևոր փախցնելու համար։ Վերջերս երթուղայիներից մեկում Lurer.com-ի թղթակիցն ականատես եղավ, թե ինչպես էր վարորդն ընթացքի ժամանակ մեկ այլ վարորդի վրա գոռում. «արա՛, ես քո նման 100 դրամանոց քիլեր չե՛մ»։

Այս ամենից բացի, խնդիր կա նաև կանգառներում տեղակայված ուղեցույցների հետ կապված, որոնք պետք է մարդկանց տեղեկացնեն, թե որ երթուղին է անցնում տվյալ կանգառով։ Բայց հաճախ դրանց փոխարեն փակցված են հայտարարություններ այս կամ այն ապրանքի առքուվաճառքի կամ մատուցվող ծառայության մասին։

«Կանգառից դուրս կանգառ չպահանջել» գրությունը նույնպես շարունակում է մնալ լոկ որպես գրություն։ Դրանում մեղավոր է նաև բնակչությունը, որը նպաստում է անօրինականությանը։ Մարդիկ շարունակում են կանգառից դուրս նստել և կանգառից դուրս կանգառ պահանջել։