Coca-Cola–ն 60 տարվա ընդմիջումից հետո վերադառնում է Մյանմա

Coca-Cola ընկերությունը 60 տարվա ընդմիջումից հետո իր արտադրանքը կներկայացնի Մյանմայում (Բիրմա), հաղորդում է Associated Press–ը։ 

Դա ԱՄՆ–ի կողմից հերթական պատժամիջոցի վերացումն է, որը պայմանավորված է Մյանմայում քաղաքական բարեփոխումներ կատարելու երկրի իշխանության պատրաստակամությամբ։ «The Coca-Cola Company»–ի ղեկավարությունը հայտնել է, որ այդ երկրում իրենց գործունեությունը կծավալեն ԱՄՆ–ի իշխանությունների կողմից նման թույլտվություն ստանալուց հետո։ 

Սկզբում Coca-Cola–ի արտադրանքը Մյանմա կարտահանվի հարևան երկրներից։ Հետագայում ընկերությունը նախատեսում է հագեցած սարքավորումներով գործարան հիմնել Մյանմայում։ 

Coca-Cola–ն իր արտադրանքի վաճառքը Մյանմայում սկսել է 1927–ից։ Սակայն 1962–2011 թթ. այդ երկրում իշխող ռազմական խունտայի պատճառով Արևմուտքը և ԱՄՆ–ը տնտեսական պատժամիջոցներ էին կիրառել Մյանմայի իշխանության նկատմամբ։

Մյանմայում Coca-Cola–ի վաճառքի վերականգնումն ազդարարում է աշխարհի բոլոր երկրներում այդ ապրանքանիշի ազատ վաճառքը, բացի Կուբայից և Հյուսիսային Կորեայից։ Coca-Cola ընկերությունը Կուբայի շուկան կորցրել է 1959–ին՝ Ֆիդել Կաստրոյի իշխանության հաստատումից հետո, իսկ Հյուսիսային Կորեայում ընկերության արտադրանքը երբեք ներկայացված չի եղել։