Դինքի գործով կասկածյալն առանց փաստաթղթերի եղել է Ադրբեջանում

Հրանտ Դինքի սպանության գործով կասկածյալ Յասին Հայալի հայրը շարունակում է նոր բացահայտումներ անել։ Նա շարունակում է պնդել, որ պետք է պատժվեն իսկական մեղավորները։ «Իմ որդին ընդամենը գործիք է եղել այդ սպանության համար»,-ասել է Բահաթին Հայալը թուրքական «Հյուրիեթին» տված հարցազրույցում։

Նա ասել է, որ իր որդին Դինքի սպանությունից առաջ եղել է Ադրբեջանում, երբ նրա մոտ չեն եղել փաստաթղթեր և գումար։ 

«Գործը երբեք չի բացահայտվի, քանի դեռ ոստիկանության իրազեկիչ Էրհան Թունջելի բոլոր կապերն ամբողջությամբ բացահայտված չեն, քանի որ իմ որդին ընդամենը գործիք է եղել նրանց ձեռքում»,-հայտարարել է նա։ 

Բահաթին Հայալն ասել է, որ Աքչաաբաթում եղած ժամանակ իր որդին իջևանել է շքեղ հյուրանոցում, ուր նրան ծանոթացրել են երկու մարդու հետ, որոնցից մեկը ազգությամբ չեչեն աշխատակազմի ղեկավար է եղել։ Նա այդ ուղևորությունը ևս հետաքննության կարիք ունեցող փաստ է համարել։

«Ես անիծում եմ այն օրը, երբ որդիս հանդիպել է Էրհան Թունջելին։ Որդուս ուզում են ցմահ դատապարտել, մինչդեռ Թունջելը կարող է ազատ արձակվել»,-ասել է Յասին Հայալի հայրը՝ ավելացնելով, որ ինքը նախապես այլ ցուցմունքներ է տվել, իսկ հետո ճնշման տակ փոխել է դրանք։

Բահաթին Հայալի խոսքերով՝ Տրապիզոնի ոստիկանության հրամանատար Յահյա Օզթյուրքն ասել է, որ նրա որդին պաշտպանել է իր հայրենիքը, և նրան երկար պատիժ չի սպառնում։

Բահաթին Հայալի հետ կապվել է նաև Մարդին նահանգի մի բարձրաստիճան պաշտոնյա և շնորհակալություն հայտնել հայրենասեր որդի դաստիարակելու համար։