ԵՄ դեսպանի թափանցիկ ակնարկը. ո՞վ էր մեղավոր 2013-ին

Վերլուծական 27 Նոյեմբեր, 2017 18:00

Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին այսօր լրագրողների հետ հանդիպման ընթացքում խոսեց Հայաստան-Եվրոպական միություն նոր համաձայնագրի մասին։ Լրագրողը հետաքրքրվեց, թե 4 տարի առաջ ո՞վ հրաժարվեց Ասոցացման համաձայնագրից՝ հիշեցնելով, որ նախագահ Սերժ Սարգսյանը, խոսելով 4 տարի առաջ չստորագրված ՀՀ-ԵՄ պայմանագրի մասին, ասել է, որ ԵՄ-ն է հրաժարվել դրա ստորագրումից։ Ի պատասխան՝ դեսպանն ասաց. «Դա իրո՞ք այդքան կարևոր է։ Ընկերնե՛ր, եկեք ապագային նայենք, չեմ կարծում, որ ժամանակն է անցյալին նայելու և կրկնելու այն զգացմունքները, որ կային 2013թ.-ին։ Հիմա մենք հստակ գիտենք, որ սա շատ կարևոր համաձայնագիր է և տարբերվում է ասոցիացման համաձայնագրից։ Սա ասոցիացման համաձայնագիր չէ, բայց ԵՄ-ն միշտ նաև առաջնորդվում է իր գործընկերների մղումներով։ Այնպես որ, սխալ է խոսել այն մասին, թե ԵՄ-ն ինչ-որ բան է պարտադրում։ Ճիշտ կլիներ խոսել դրա մասին, եթե այս համաձայնագիրը նման լիներ 2013թ.-ին բանակցված համաձայնագրին»:

Սվիտալսկին, իհարկե, պահպանելով դիվանագիտական էթիկան, չի բարձրաձայնի, թե որ կողմն էր իրականում 2013-ին հրաժարվել Ասոցացման համաձայնագրից, սակայն ակնարկը, որ ԵՄ-ը միշտ առաջնորդվում է իր գործընկերների մղումներով, ակամայից բացահայտում է, որ այդ որոշումը պայմանավորված էր հենց ՀՀ մղումով: Մյուս կողմից՝ Սվիտալսկին մատնանշում է՝ ԵՄ-ը չպարտադրեց այդ ժամանակ Հայաստանին՝ կատարել ստանձնած պարտականությունները: Այս տեսանկյունից՝ թեև ՀՀ-ԵՄ համապարակ համաձայնագիրը տնտեսական և քաղաքական բաղադրիչով զիջում է ասոցացման պայմանագրին՝ Հայաստանը ստանձնել է պարտականություններ, որոնք, ըստ Սվիտալսկու՝ բխում են հենց մեր շահերից, հետևաբար, անհրաժեշտ չէ պարտադրանք՝ այդ պարտականությունները կյանքի կոչելու հարցում: Սա մինիմում ծրագիրն է, որն առավելապես պետք է Հայաստանին, ի տարբերություն ՀՀ-ԵՄ ասոցացման պայմանագրի, որն ամբողջությամբ բխում էր ԵՄ շահերից, թերևս հենց այդ պատճառով էլ մնաց առկախված: Եթե հայկական կողմը կատարի ստանձնած պարտականությունները՝ դրանից միանշանակ շահելու են ՀՀ թե՛ տնտեսական, թե՛ քաղաքական համակարգերը, իսկ եթե թերանա՝ տուժողը նույնպես մեկն է լինելու՝ Հայաստանը:

Ստելլա Խաչատրյան