«Հրապարակ». Հրապարակվեց «ժամանակավոր» կառավարության կազմը

Որքան երկար ու սրտամաշ էր «նոր» կառավարության կազմավորման ընթացքը, նույնքան արագ է ներկայացվել նոր կազմը ՀՀԿ-ականների դատին: Երեկվա ՀՀԿ գործադիր մարմնի և խորհրդի նիստը տևել է 10-ական րոպե: Սերժ Սարգսյանը ներկայացրել էր չորս նոր նախարարներին, բոլորը միաձայն ասել են՝ հա, որևէ մեկը չի ունեցել «անձնական կարծիք»: Ներկայացնելով սպորտի և երիտասարդության անկուսակցական, իրականում ԲՀԿ-ական նախարար Հրաչյա Ռոստոմյանին, Սերժ Սարգսյանը շեշտել է՝ անկուսակցական, նորմալ, գրագետ, լեզուների տիրապետող մասնագետ է. «Թող Օլիմպիական կոմիտեի նախագահի հետ նորմալ աշխատեն»: Ի դեպ, փոխնախարարների, փոխմարզպետների, ԾԻԳ-երի, վարչությունների պետերի հետ միասին ԲՀԿ-ական-«անկուսակցական» այս նախարարը կապահովի ԲՀԿ-ի' կառուցողական ընդդիմանալու հանգամանքը: Դերենիկ Դումանյանի առնչությամբ Սերժ Սարգսյանն ասել է՝ փորձառու գործիչ է, առողջապահության ոլորտում երկարամյա աշխատանքային փորձ ունի, կարող է ոլորտը կազմակերպել: Սոցապնախարար Արտեմ Ասատրյանին բնութագրել է որպես բարեփոխումներին տեղյակ, ոլորտը լավ իմացող, քանի որ երկար տարիներ փոխնախարար է աշխատում: Ինչ վերաբերում է կապի և տրանսպորտի նախարար առաջարկվող Գագիկ Բեգլարյանին, ապա ասել է՝ տանք հնարավորություն, թող աշխատի: Ժամը 22-ի դրությամբ ՀՀԿ-ականները դեռ ոչ մի տեղ չէին գնացել՝ «մի բաժակ բան խմելու», պորտֆելները թրջելու համար: Մի բան պարզ է, որ սա «ժամանակավոր» կառավարություն է և աշխատելու է մինչև նախագահական ընտրություններ: