«Հրապարակ». Կառավարության հի՞նն է լավ. խմբագրական

Վերջապես հայտնի է կառավարության կազմը, որին այդքան սպասում էր հանրությունը: Թեև պարզվեց՝ սպասելու բան առանձնապես չկար: Հին-նոր այս կազմով հնարավոր չի լինելու որևէ բան փոխել: Այս կազմից կարելի է եզրակացնել, որ Սերժ Սարգսյանը փոխելու ցանկություն ու մտադրություն էլ չունի: Գոնե առայժմ: Ընդհանրապես նրա գործողություններում ամենից շատ դրսևորվող ուղենիշը ստատուս-քվոյի պահպանումն է: Նա «դանդաղ ու հեռուն» գնացողների թվին է պատկանում, որոնք վախենում են ինչ-որ բան փոխել իրենց կյանքում, քանի որ ամեն փոփոխության մեջ վտանգ են տեսնում: Եվ այսպես՝ կառավարության կազմը հնարավորինս պահպանվեց: Անգամ բնապահպանության նախարար Արամ Հարությունյանը, որի պաշտոնանկության մասին տարիներ շարունակ խոսվում է, մնաց: Վերադարձավ Գագիկ Բեգլարյանը՝ ճիշտ է, ոչ թե քաղաքապետի , այլ կապի և տրանսպորտի  նախարարի տեսքով, բայց սա էլ վատ չէ: Գոնե իր համար: Ինչպես և կանխատեսել էինք, առողջապահության նախարար նշանակվեց Դերենիկ Դումանյանը, ով առանձնապես չի փայլել Բժշկականի ռեկտորի պաշտոնում: Քաղաքաշինության նախարար նշանակվեց Վերահսկիչ պալատի նախկին աշխատակից, ՕԵԿ անդամ Սամվել Թադևոսյանը: Ի դեպ, Վերահսկիչն իսկական կադրերի դարբնոցն է դարձել՝ կարծեմ չորրորդ նախարարն է նշանակվում այս կառույցից: Բայց ամենազավեշտալին սպորտի նախարարի նշանակումն է. ԲՀԿ-ականին մեկ օրում դարձրին «անկուսակցական» և ՀՀԿ-ի քվոտայով նշանակեցին նախարար: Սա էլ, ըստ ամենայնի, արվել է Օլիմպիական կոմիտեի նախագահ Գագիկ Ծառուկյանի սիրտը շահելու համար: Այս ամենից հետո ասել, որ կոալիցիա չի ձևավորել, և կառավարությունը ձևավորել է մեծամասնություն կազմող ուժը՝ ՀՀԿ-ն, որն առաջնորդվել է, «Հավատանք, որ փոխենք» սկզբոնքով, առնվազն ծիծաղելի է: