Գիտնականը վաճառողից քիչ է վարձատրվում

Երիտասարդ գիտնականների աշխատավարձն այսօր քիչ է տարբերվում նվազագույն աշխատավարձից։ Այսօր լրագրողների հետ հանդիպման ժամանակ այս հարցին անդրադարձան Բյուրականի աստղադիտարանի տնօրեն Հայկ Հարությունյանն ու Հայկական աստղագիտական ընկերության համանախագահ Արեգ Միքայելյանը։

Այսօր երիտասարդ գիտաշխատողներն ստանում են 35-45.000 դրամ, ինչը չի կարող բավարար լինել, որպեսզի մարդը կարողանա միայն գիտությամբ զբաղվելով ապրել։ Երիտասարդները սիրում են աստղագիտությունը, բայց գիտությանը նվիրվելու համար աշխատում են գոնե մի քանի ամսով հայտնվել արտասահմանում, վարձատրվել նրանց չափանիշներով ու փոքր-ինչ բարելավել իրենց կացությունը։

Գիտության (հատկապես աստղագիտության) ցածր ֆինանսավորումը պատճառ է դառնում, որ քչերն ընտրեն այս մասնագիտությունը։ Աստղագիտության բոլոր միջազգային օլիմպիադաներից հայ աշակերտները բարձր տեղեր ու մեդալներ են բերում, բայց հետագայում այդ պատանիները հիմնականում աստղագետ չեն դառնում։ 

Արեգ Միքայելյանը նշեց, որ պարզապես ամոթալի և ծիծաղելի է, որ գիտնականն ավելի քիչ է վարձատրվում, քան խանութի վաճառողը։ Բանախոսն ասաց, որ աշխատավարձի չափն էլ, ապրանքի գնի նման, պիտի որոշվի ըստ «ինքնարժեքի», քանի որ գիտնական դառնալու համար մարդը երկար ճանապարհ պիտի անցնի, և գիտնականները շատ քիչ են։

«Գրանտներով հնարավոր է որոշ հարցեր կարգավորել, ծրագրեր իրականացնել, բայց առանց պետական աջակցության աստղագիտություն չես զարգացնի»,-ասաց Միքայելյանը։