Աշխարհի ամենալուռ վայրը կարող է խելագարության պատճառ դառնալ

Ասում են՝ «լռությունը ոսկի է», բայց ԱՄՆ-ի Միննեսոտա նահանգում կա մի սենյակ, որն այնքան լուռ է, որ ինչ-որ ժամանակ հետո դրանում գտնվելն այլևս անտանելի է դառնում։ Սենյակն արգլափակում է արտաքին աղմուկների 99.99 տոկոսը և ոչ ոք դեռ դրանում չի դիմացել 45 րոպեից ավելի։

Աշխարհի ամենալուռ վայրը, Գինեսի ռեկորդների գրքի համաձայն, գտնվում է Հարավային Մինեապոլիսի Օրֆիլդի Լաբորատորիայում (Orfield Laboratories)։ Բացառիկ լռություն ստանալու համար, սենյակը կառուցելիս կիրառել են մեկ մետր լայնությամբ ապակեթել ակուստիկական հիմնաշերտեր, մեկուսացված պողպատից կրկնակի պատեր և 30 սմ հաստության բետոն։

Ընկերության հիմնադիր և տնօրեն Սթիվեն Օրֆիլդը պատմել է, որ երբ լռությունը դառնում է բացարձակ, ձեր լսողությունը սկսում է հարմարվել։ «Որքան ավելի լուռ է սենյակը, այնքան իրականում ավելի շատ բան եք սկսում լսել. օրինակ՝ ինչպես է բաբախում սիրտը, ինչպես են շարժվում թոքերը կամ ինչ ձայներ են հանում ձեր աղիները և այլն»,- բացատրել է հիմնադիրը՝ հավելելով. «Անարձագանք սենյակում դուք ինքներդ եք ձայն դառնում»։

Օրֆիլդը բացատրել է, որ այս հանգամանքը խիստ շփոթեցնող է և ստիպում է ձեզ իրականում մի տեղում նստած մնալ, որովհետև տարածության մեջ, օրինակ՝ քայլելիս, մենք կողմնորոշվում ենք այն ձայներով, որոնք լսում ենք։ Անարձագանք սենյակում, ուր չկա ոչ մի ազդակ, որը ձեզ թույլ կտա հավասարակշռվել և մանևրել, ավելի լավ է փորձել նստած մնալ։

Այս խցիկն օգտագործվում է մի շարք արտադրողների կողմից սեփական արտադրանքի ձայնի բարձրությունը կամ աղմուկը չափելու համար (սրտի փականներ, բջջային հեռախոսների էկրաններ, անջատիչներ), ինչպես նաև ձայնի որակի ստուգման նպատակով։

Մարդու համար, սակայն, այդ սենյակը կարող է լուրջ փորձություն դառնալ։ Դրանում գտնվելուց մի քանի րոպե անց սկսում եք համակերպվել ձայնի բացակայության հետ՝ որսալով ավելի ու ավելի թույլ ձայնային ազդանշանները։ Ծանր դեպքերում դրանք լսելը ունակ է հյուծել մարդուն։ NASA-ի տիեզերագնացները, որոնց մարզում են ջրային հատուկ ամբար-մեկուսարաններում, այս սենյակում որոշ ժամանակ հետո սկսում են հալյուցինացիաներ ունենալ, քանի որ մեր մարմինը փորձում է ոչնչից ձայներ ստեղծել։

Ամենաերկար ժամանակը, որը մարդը կարող է անցկացնել այս սենյակում, երբ անջատված է նաև դրա լույսը, կազմել է 45 րոպե։ Ինքը՝ հիմնադիրը, դիմացել է միայն 30 րոպե՝ վստահեցնելով, որ մարդուն ամենաշատը շեղում է ոչ թե աղմուկը, այլ հենց լռությունը։