«Հարություն» առավ Կարավաջոի «Ղազարոսի հարությունը»

Կարավաջոի «Ղազարոսի հարությունը» նկարը վերջին 60 տարիների ընթացքում առաջին անգամ վերականգնվեց:

Ենթադրվում է, որ Կարավաջոն կտավը նկարել է Հովհաննու Ավետարանի սյուժեյով 1609թ-ին, մահվանից մեկ տարի առաջ: Լեգենդի համաձայն, կտավը ճշմարտանման դարձնելու համար Կարավաջոն Ղազարոսին նկարել է արտաշիրիմված դիակից: Ինչպես ենթադրում են մշակութաբանները, կտավի սև ֆոնը վկայում է այն մասին, որ նկարիչը ստիպված էր կտավը ավարտել շատ արագ՝ բավարարելու իր մեծահարուստ պատվիրատուի ժամկետները: 3.8 մետր լայնությամբ և 2.73 մետր երկարությամբ կտավը կարված է 6 մասերից:

Նկարի վերականգման համար մասնագետները աշխատել են ուղիղ 7 ամիս: Գիտնականների խոսքով ամենադժվար վերականգնվող հատվածն այն կորուստներն էին, որոնք առաջացել էին դեռևս նկարի առաջին ռեստավրացիայի ընթացքում՝ 1670թ-ին, երբ Անդրեա Սուպան ջնջել էր կտավի ներկը: Այս քայլը մեր օրերում դաժան քննադատության կենթարկվեր մասնագետների կողմից: Ըստ լեգենդի, այդ անելուց հետո Սուպան մահացել է սրտի կատվածից:

Կտավը կներկայացվի Հռոմում, ապա կտեղափոխվի «ծննդավայր» Մեսիննա՝ Սիցիլիա: Կարավաջոյի նկարը ոչ մի վնաս չի կրել 1908թ Մեսինայում տեղի ունեցած ուժգին երկրաշարժի ժամանակ, որի հետևանքով մահացել է 200 հազար մարդ և փլուզվել էին բազում կառույցներ: