Նորածինների «հոգևոր մաքրման» փառատոն Իսպանիայում. Էլ Կոլաչո (Ֆոտոշարք)

Ամեն տարի գարնան վերջին և ամռան սկզբին Իսպանիայի Կաստիլյո դե Մուրսիա (Castrillo de Murcia) փոքրիկ քաղաքում տեղի է ունենում ինքնատիպ «մաքրման» փառատոն` Էլ Կոլաչո անվանմամբ:

Առաջին անգամ այս փառատոնը տեղի է ունեցել դեռևս 1620 թվականին: Դրա գլխավոր նպատակը նախորդ արարողությունից հետո ծնված նորածինների «հոգևոր մաքրումն է»: Տեղի բնակիչները հավատում են, որ այդ արարողակարգն օգնում է նորածիններին ազատվել «չար աչքից», անեծքից և հեռու է պահում հիվանդություններից և չար ուժերից:

Արարողությունը կատարվում է հետևյալ կերպ. իսպանացիների կողմից նշվող Տիրոջ Մարմնի օրը (Corpus Christi) տեղական Santísimo Sacramento de Minerva հոգևոր եղբայրության անդամները, հագնելով կարմիր և դեղին գույներով «սատանայի» հանդերձանք, դիմակ են դնում և ձեռքները վերցնում մտրակ և մահակ: Նման տեսքով նրանք շրջում են քաղաքի փողոցներով և տեղի բնակիչներին որոշ ժամանակ «վախեցնելուց» հետո, հավաքվում գլխավոր հրապարակում, որտեղ փափուկ ներքնակների վրա արդեն պառկեցված են լինում նորածինները:

Կոլաչո սատանայի հանդերձանքով մարդը, մեծ արագություն հավաքելով, ցատկում է նորածին մանուկների վրայով` դրանով իսկ իր հետ «տանելով» ողջ չարիքն ու հիվանդությունները: