«Տիեզերական դարաշրջանի 50-ամյակը»

Հայաստանում նոյեմբերի 21-25-ը կանցկացվի ԱՊՀ երկրների եիտասարդ աստղագետների համաժողով՝ նվիրված մարդու կողմից բաց տիեզերք դուրս գալու 50-ամյակին։ Համաժողովի խորագիրն է «Տիեզերական դարաշրջանի 50 տարին. երկնքի իրական և վիրտուալ ուսումնասիրություններ»։

Ինչպես նշեց Հայկական աստղագիտական ընկերության համանախագահ, համաժողովի կազմկոմիտեի նախագահ Արեգ Միքայելյանը, համաժողովին մասնակցելու հրավեր ուղարկվել է ԱՊՀ անդամ բոլոր երկրներին, սակայն մասնակցության ցանկություն հայտնել է 6 երկիր, այդ թվում՝ ԱՊՀ անդամ չհամարվող մերձբալթյան երկրները։

Դասախոսելու է չորս գիտնական, որոնցից երկուսը Հայաստանից, երկուսը՝ Ռուսաստանից։ Համաժողովին մասնակցելու է ավելի քան 40 երիտասարդ աստղագետ, հիմնականում արտասահմանից։ 

«Այդ 4 դասախոսներն իրենց դասախոսություններով հանդես կգան, բայց ավելի կարևորություն ենք տալիս ուսանողների և երիտասարդ մասնագետների զեկույցներին: Սա շատ լավ հնարավորություն է հայ աստղագետների համար՝ ծանոթանալու իրենց կոլեգաների հետ և փորձ փոխանակելու: Այս դաշտի մասնագետները քիչ են ամբողջ աշխարհի կտրվածքով, այդ պատճառով նման հանդիպումները հատկապես կարևոր են  միմյանց հետ ծանոթանալու առումով», - ասաց Արեգ Միքայելյանը։

Համաժողովն անցկացվում է Հումանիտար համագործակցության խորհրդի ֆինանսավորմամբ։