Օդանավն ընկել է գոլֆի դաշտում

Օդաչուն կոտրվածք է ստացել այն բանից հետո, երբ ԱՄՆ-ի Այդահո նահանգում օդային ելույթի ժամանակ սպորտային օդանավն ընկել է գոլֆի դաշտում, հաղորդում է Associated Press-ը։

Միջադեպը տեղի է ունեցել ուրբաթ օրը` Ռեքսբերգ քաղաքում տեղի ունեցող «Legancy Air Show»-ի ժամանակ, որտեղ ամեն տարի հարյուրավոր օդաչուներ և սպորտային օդանավերի երկրպագուներ են հավաքվում։

Կազմակերպիչներից մեկի՝ Բրեդ Դոբուի խոսքերով՝ ցուցադրական ելույթի ժամանակ խափանվել են օդանավի շարժիչները։ Օդաչուին հաջողվել է ինքնաթիռը հեռացնել հանդիսատեսից. այն ընկել է գոլֆի դաշտում։

Օդաչուն թեթև վնասվածքներ է ստացել, հանդիսատեսից ոչ-ոք չի վնասվել։

Նմանատիպ մի դեպք, բայց ավելի ողբերգական հետևանքներով, տեղի էր ունեցել այս տարվա սեպտեմբերին Նևադա նահանգի Ռինո քաղաքում կայացած սպորտային ինքնաթիռների ազգային առաջնության ժամանակ, երբ 2-րդ համաշխարհային պատերազմի P-51 Mustang կործանիչն ընկել էր հանդիսատեսի վրա, ինչի հետևանքով 11 մարդ էր զոհվել։