Ծխախոտ արտադրող ընկերությունները դատի են տվել ԱՄՆ կառավարությանը

ԱՄՆ-ում ծխախոտի արտադրությամբ զբաղվող 5 ընկերություններ դատի են տվել ապրանքների և դեղորայքի որակի վերահսկողությամբ զբաղվող ամերիկյան կառավարությանը՝ պահանջելով կասեցնել ծխախոտի տուփերի վրա ծխելու հետևանքով առաջացող հիվանդությունների նկարները փակցնելու մասին օրենքը։

Համաձայն 2009թ-ին ընդունված օրենքի՝ Ամերիկայի ծխախոտ արտադրող գործարանները պարտավորվում են 2011թ-ի սեպտեմբերից իրենց արտադրանքի տուփի վրա փակցնել ծխելու վնասի մասին զգուշացումներ։ Դրանք պետք է լինեն ծխելուց վնասված թոքերի, մահացած մարդկանց մարմինների և փտած ատամների տեսքով նկարներ։

Այս նկարները պետք է գտնվեն տուփի վերևի մասում, իսկ տպագիր գովազդի դեպքում զբաղեցնեն ոչ պակաս քան պաստառի 20%-ը։

RJ Reynolds Tobacco ( Camel և Winston), Lorillard Tobacco (Newport և True), Commonwealth Brands (Davidoff և West) և Liggett Group և Santa Fe Natural Tobacco արտադրությունները կարծում են, որ օրենքը խախտում է ԱՄՆ-ի Սահմանադրությամբ պաշտպանված խոսքի ազատության իրենց իրավունքը։

Կառավարության դեմ ուղղված հայցին չի միացել ամերիկյան ծխախոտագործության մեջ հայտնի Philip Morris-ին պատկանող Altria ընկերությունը՝ իր Marlboro ապրանքատեսակով։

Ինչպես հայտնում է քաղցկեղի դեմ պայքարող ամերիկյան կազմակերպություններից մեկը՝ 2011թ-ին ԱՄՆ-ի 220 հազար բնակիչների մոտ ախտորոշվել է թոքերի քաղցկեղ։