2017թ.-ին Գավառում ոչ մի ներդրում չի արվել

Քաղաքական 13 Դեկտեմբեր, 2017 17:35

Գավառ քաղաքի հիմնախնդիրների, Կառավարության հետ համագործակցության, ներդրումային քաղաքականության և Սերժ Սարգսյանի՝ համայնքապետերին ուղղված դիտարկումների վերաբերյալ ԼՈւՐԵՐ.com-ը զրուցեց Գավառի քաղաքապետ Գուրգեն Մարտիրոսյանի հետ.

-Պարո՛ն Մարտիրոսյան, որո՞նք են Գավառ քաղաքի հիմնախնդիրները, 2017թ.-ը կատարողանի ի՞նչ ցուցանիշով եք ավարտում:

-Գավառ քաղաքի համար շարունակում է հիմնախնդիր մնալ աշխատատեղերի բացակայությունը, երբեմնի արդյունաբերական քաղաքը, որտեղ գործել է միայն 14 գործարան ու արտադրամաս, այսօր աշխատատեղերի լուրջ խնդիր ունի: Գավառի բնակչության հիմնական զբաղմունքն անասնապահությունն ու դաշտավարությունն է, որի կազմակերպման համար հիմնախնդիրներ են հանդիսանում ոռոգման ընդհանուր ցանցի բացակայությունը և ջրարբիացումը: Ճիշտ է, վերջին տարիների ընթացքում այս ուղղություներով աշխատանքներ կատարվել են, սակայն մասնակի ջրարբիացվել են որոշակի արոտավայրեր, իսկ «Գյուղատնտեսության աջակցության» ծրագրով ոռոգման սեղոնից 40 հա տարածք Արծվաքարում կոռոգվի:

Քաղաքի համար հիմնախնդիր է փողոցների ջրահեռացման համակարգի բացակայությունը, ինչը խնդիրներ է առաջացնում բարեկարգ փողոցների պահպանման առումով: Հիմնանորոգման խնդիր կա ներհամայնքային փողոցներում: Համայնքում քիչ են ժամանցի վայրերը:

Թվարկված խնդիրներին լուծում տալու ուղղությամբ Գավառի քաղաքապետարանը քայլեր է ձեռնարկում համայնքում ներդրողներ գտնելու, բյուջեի միջոցներով աշխատանքներ կատարելու համար, սակայն բյուջեի սղության պատճառով հնարավոր չի լինում այսօրինակ գլոբալ խնդիրների լուծում տալ:

2017 թվականին, այսօրվա տվյալներով՝ ապահովվել է 92,5% կատարողական, որից սեփական եկամուտներինը կազմում է 83,5%:

-Սեփական եկամուտների հավաքագրման առումով ի՞նչ ցուցանիշ եք արձանագրել՝ հաշվի առնելով Նախագահ Սարգսյանի դիտարկումը, որ այսուհետ համայնքները պետբյուջեից կստանան ավելին ավելիի դիմաց, այսինքն՝ այնքան գումար, որքան հավաքել են:

-Սեփական եկամուտների հավաքագրման ուղղությամբ իրականացվում են տարաբնույթ աշխատանքներ: Հանդիպումներ են կազմակերպվում բնակիչների հետ, ներկայացվում է հավաքագրման բավարար արդյունք ապահովելու դեպքում համայնքում նախատեսվող ծրագրերի իրականացումը և դրանից բխող լավ հետևանքները:

Համայնքի ու բնակիչների համար կատարված աշխատանքներում շեշտադրվում է եկամուտների հավաքագրման գործոնը:

-Գավառ քաղաքում իրականացվո՞ւմ են արդյոք ներդրումային ծրագրեր, եթե այո՝ ըստ նախնական արդյունքների՝ որքա՞ն գումար կարող են այդ ծրագրերն ուղղորդել քաղաքի բյուջե և ինչ ժամկետներ կարող եք նշել դրանց համար:

-Բիզնես ոլորտում՝ համայնքում, ցավոք, ներդրումներ չեն եղել. 2018-ին նախատեսում ենք գտնել գործարարներ, մասնակցության հայտեր ներկայացնել համապատասխան ծրագրերին` այդ բացը լրացնելու համար:

-ՀՀ նախագահ Սերժ Սարգսյանը դեկտեմբերի 9-ին համայնքապետերի հետ հանդիպմանը խոսեց ՀՀ մեկ շնչին ընկնող ՀՆԱ-ն եռապատկելու մասին: Որպես Գավառի քաղաքապետ, որքանո՞վ եք դա իրատեսական համարում և ի՞նչ քայլեր եք պատրաստվում իրագործել այդ ուղղությամբ:

-Ինչ վերաբերում է ՀՀ նախագահի կողմից ներկայացված՝ ՀՀ 1 շնչին ընկնող ՀՆԱ-ի եռապատկմանը, կարող եմ ասել, որ ասվածն ունի իրատեսական հիմքեր և մեր ապագա գործունեությամբ պետք է անենք հնարավորը՝ դա ապահովելու ուղղությամբ: Իսկ քայլերի հաջորդականությունը կպայմանավորվի ընթացիկ համատեղ աշխատանքով:

- Նախագահ Սարգսյանի ելույթում ո՞րն էր ամենակարևոր մեսիջն՝ ըստ Ձեզ:

- ՀՀ նախագահի ելույթում ամենակարևոր ուղերձն այն էր, որ այսուհետև համայնքի ղեկավարները պետք է առավել զգոնությամբ իրականացնեն համայնքի կառավարումը:

Հարցազրույցն՝ Աղավնի Սուքիասյանի