Apple-ի առաջին համակարգիչը վաճառվել է մեկնարկային գնից երկու անգամ թանկ

Apple-ի առաջին համակարգիչը Նյու-Յորքի Sotheby's աճուրդում վաճառվել է մեկնարկային գնից երկու անգամ ավելի թանկ՝ 374 հազար դոլարով։ Այս մասին հայտնում է աճուրդի տան կայքում։

Մոդելն առաջին անգամ հայտնվել է վաճառքում 1976 թվականին։ Աճուրդում վաճառքի էր հանվել համակարգչի մայրատախտակը, պրոցեսորը, վիդեո-տերմինալը, ստեղնաշարը, հիշողության մոդուլները, սնման մարտկոցները և այլն, ինչպես նաև ծրագրային ապահովումը։

Գնորդը ցանկացել է անհայտ մնալ և աճուրդին մասնակցել է հեռախոսով, նշում է Agence France-Presse-ը։

Ենթադրվում է, որ Սթիվ Ջոբսի և Սթիվ Վոզնիակի կողմից հիմնադրված Apple-ի առաջին թողարկման համակարգիչներից աշխարհում պահպանվել է ընդամենը 50 հատ, ընդ որում դրանցից աշխատանքային վիճակում են միայն 6-ը։ Վաճառված համակարգիչը, ինչպես հայտնում է Sotheby's-ը, շատ լավ է պահպանված և ունակ է աշխատել։