Նանսենի այգում շինարարությունը չեն դադարեցնի մինչև քաղաքապետարանից չկարգադրեն

Նանսենի այգում կառուցվող թանգարանի շինարարությունը չի կասեցվելու մինչև քաղաքապետարանից համապատասխան հրահանգ չլինի։ Լուրեր.com-ի թղթակցի հետ զրույցում այդպիսի հայտարարություն արեց կառուցապատումն իրականացնող Ժորա Սարգսյանը։ «Քաղաքապետարանն է ասել՝ սարքեք, ինքն էլ պիտի դադարեցնելու հրաման տա, դուք ձեր հարցերն իրենց հետ լուծեք։ Ու ձերոնց էլ ասեք՝ չփորձեն գալ ու մեր աշխատանքները խանգարել»,-ասաց նա։ Առավոտյան նա և մի քանի բանվոր եկել էին երեկ սկսված փորման աշխատանքները շարունակելու։

Հավաքված բնակիչները ևս հորդորում էին կառուցապատողին դադարեցնել աշխատանքները մինչև քաղաքապետարանի պատասխանը։ 

Մեր հարցին, թե ինչու հանրությունը չի իրազեկվել, որ այգում շինարարություն է իրականացվելու, Ժորա Սարգսյանն ասաց. «Մենք որ եկել ենք տարածքը չափելու ու ցուցանակները դրել ենք, բոլոր մոտեցողներին սիրով բացատրել ենք, որ Նանսենի թանգարան է լինելու էստեղ, ու բոլորն էլ շատ գոհ գնացել են»։ 

Սակայն այլ բան էին վկայում աստիճանաբար հավաքվող բնակիչները։ Նրանք ասացին, որ իրենցից ոչ մեկը նախապես տեղյակ չի եղել, որ այդտեղ պատրաստվում են թանգարան կառուցել, թեև ամեն օր լինում են այգում։ Նրանք նաև անվստահությամբ են վերաբերվում հավաստիացումներին, որ այդտեղ թանգարան է կառուցվելու։

«Ես ի՞նչ իմանամ, որ թանգարան է լինելու։ Վերջում կամ ինչ-որ մեկի օբյեկտն է դառնալու, կամ էլ, ոնց որ սովորաբար են անում, մի երկու տարուց կասեն, թե թանգարանը չէր գործում, մարդ չէր մտնում, փակում ենք ու սրճարան ենք սարքում։ Օրինակն աչքերիս առաջ է. Գայի արձանի կողքին ձմեռային այգի էին սարքելու, ցուցանակն էլ կար, գնացեք տեսեք՝ սուպերմարկետ են սարքել, հետևն էլ նորից ինչ-որ խանութ են սարքում»,-ասաց բնակիչներից մեկը։

«Հա, Նանսենի համար թանգարան են սարքում՝ լավ են անում, բան չունեմ ասելու, բայց ինչի՞ հենց այգու մեջտեղում։ Չեմ հասկանում՝ ուրիշ տեղ չկա՞։ Թող գնան մի ամայի տեղ սարքեն, տարածքն էլ բարեկարգեն, ծառեր տնկեն կողքը, ժողովուրդն էլ կուրախանա, որ մի լավ բան արեցին, ինչի՞ են ուզում անպայման այգին փչացնել»,-վրդովմունքով ասաց մեկ ուրիշը։

Բնակիչները նշում են, որ հենց այգու կողքի շենքի առաջին հարկում մի մեծ տարածք անտերության է մատնված, դռներ ու պատուհաններ չկան, աղբանոցի ու հասարակական զուգարանի է վերածվել։ Նրանք առաջարկում են հենց այդ տարածքը մաքրել, վերանորոգել և սարքել Նանսենի թանգարան։

Մեր զրույցի ընթացքում Ժորա Սարգսյանին զանգեցին քաղաքապետարանից։ Ինչպես մեզ ասաց Սարգսյանը՝ նրան հաղորդեցին, որ քաղաքապետարանը կիրականացնի հանրային լսումներ՝ շրջակայքի բնակչության կարծիքն իմանալու համար, և հրահանգեցին շարունակել աշխատանքները։

Մեր հարցին, թե ինչո՞ւ են պատրաստվում շարունակել աշխատանքները, եթե քաղաքապետարանն ինքն էլ է ընդունում, որ դեռ բնակիչներն այդ շինարարությանը հավանություն չեն տվել, Սարգսյանն ասաց. «Դե թեթև գործերը կանենք, հո մարդիկ պարապ չե՞ն կանգնելու, կաշխատենք, իսկ եթե ասեն, որ չի սարքվելու, էլ չենք աշխատի»։ Ըստ հաղորդմամբ՝ շինարարությունն ավարտին հասցնելու համար իրենց երեք ամիս է տրվել։

Սարգսյանն ու աշխատողներից մեկն ակտիվորեն փորձում էին ապացուցել, որ տարածքում անգամ ծաղիկներ չեն եղել։ «Եկեք տեսեք, ցուցանակի վրա հին նկարն էլ կա մինչև փորելը։ Տեսեք, որ ոչ մի ծաղիկ չի եղել, իսկ ձերոնք երեկ եկել ասում են, որ էստեղ ծաղիկներ կային»,-ասաց Սարգսյանը։

Բնակիչներից մեկը, ով չցանկացավ ներկայանալ, ասաց, «Անցած տարի էստեղ էնպիսի ծաղիկներ կային, էս տարի երևի նախօրոք գիտեին, որ բան են սարքելու, դրա համար կանաչապատման տնօրենը չթողեց, որ էդ կողմը ծաղիկներ դնեն։ Նայեք, բոլոր տեղերում ծաղիկները ցանել են, էդքան տեղում՝ չէ։ Ասում են՝ շինարարությունն էս կողքի ատամնաբուժարանի տերն  է անում,, ախպերն էլ դատախազ է, ազգանունը Եսայան է, թե ով է՝ չեմ իմանում։ Էս ատամնաբուժարանի տիրոջ մայրն էլ էս կողքի շենքում է ապրում, ինքն էլ չգիտեմ որտեղ տարածք է վերցրել, էլի շինարարություն է անում, իր համար բաներ է սարքում։ Էս թույլտվությունն էլ երևի դատախազ եղբայրն է դասավորել»։