Մեկնարկում են որմնանկարների վերականգնման ու պահպանման թեմաներով դասընթացներ

ՀՀ մշակույթի և Իտալիայի արտաքին գործերի նախարարությունների միջև 2011 թ. ապրիլի 6-ին ստորագրվել է «Աջակցություն հայկական հաստատություններին տեղական մշակութային ժառանգության պահպանության և ամրակայման համար» տեխնիկական համաձայնագիր: Իրականացվող համագործակցային ծրագիրն իր մեջ ներառում է հետևյալ կետերը.

«Հուշարձանների ճարտարապետական վերականգնման գծով» մագիստրոսական դասընթացներ` Երևանի ճարտարապետության և շինարարության պետական համալսարանում:

Որմնանկարների վերականգնման բնագավառում` «Էրեբունի» պատմահնագիտական արգելոց- թանգարանում:
Շարժական մշակութային արժեքների և հնագիտական արժեքների վերականգնման բնագավառում` ՀՀ ազգային պատկերասրահում և ՀՀ պատմության թանգարանում:

Շինհրապարակների ղեկավարների և վարպետների վերապատրաստում Ճարտարապետական վերականգնման բնագավառում` վերականգնման կենտրոնում:

ՀՀ մշակույթի նախարարության աջակցությամբ, Միլանի դելի ստուդի /deglistudi/, Ֆլորենցիայի համալսարանների, ՀՀ ԳԱԱ հնագիտության և ազգագրության ինստիտուտի համագործակցությամբ, ինչպես նաև «Էրեբունի» արգելոց-թանգարանի, «ԻԿՕՄՕՍ/Հայաստան» հասարակական կազմակերպության, «Մինաս Ավետիսյան» մշակութային բարեգործական հիմնադրամի համագործակցությամբ մեկնարկում են հնագիտական, ինչպես նաև որմնանկարների վերականգնման և պահպանման թեմաներով դասընթացներ:

Հնագիտական դասընթացը մեկնարկում է հունիսի 18-ին և կշարունակվի մինչև նոյեմբեր. այն իր մեջ ներառում է տեսական և գործնական մասեր /դաշտային աշխատանքներ/, որոնց նպատակը հնագիտական գործընթացին վերաբերող բոլոր փուլերի ուսումնասիրումն է /փաստագրում, չափագրում, ինչպես նաև հնագիտական վերականգնմանն ուղղված խնդիրներ, արժևորում, օգտագործում/:

Դասընթացի տեսական մասը կանցկացվի ԵՃՇՊՀ-ի ճարտարապետության ֆակուլտետում, իսկ գործնական պարապմունքները` Արուճի պեղավայրում: Դասախոսությունները կվարեն Միլանի Պոլիտեխնիկի դասախոսներ Սուզաննա Բորտոլոտտոն, Անդրեա Գարձուլինոն, Մատիլդե Մարձուլլոն, Լուիջի Մարինոն, Ջովաննա Բանիասկոն: Դասընթացին կհետևեն ավելի քան 15 հնագետներ, ինչպես նաև այն ուսանողներն, ովքեր արդեն 2011 թվականի նոյեմբերից ԵՃՇՊՀ-ում մասնակցում են հայ և իտալացի դասախոսների կողմից անցկացվող մագիստրոսական դասընթացներին: Հուլիս-նոյեմբեր ամիսներին Արուճի հնավայրում կկատարվի հնագիտական հետազոտություններ, կանցկացվեն ինչպես տեսական դասընթացներ, այնպես էլ գործնական պարապմունքներ:

Որմնանկարների պահպանմանը և վերականգնմանը նվիրված դասընթացը կմեկնարկի հունիսի 25-ից` տեսական և գործնական փուլերով: Դասընթացի տեսական մասը կանցկացվի հունիսի 25-29-ը և հուլիսի 30-ից օգոստոսի 10–ը «Էրեբունի» պատմահնագիտական արգելոց-թանգարանում, իսկ հուլիս-օգոստոս ամիսներին գործնական պարապմունքներ կանցկացվեն Գյումրիում:

Մասնակցելով սույն դասընթացի տեսական և գործնական փուլերին երիտասարդ մասնակիցները ձեռք կբերեն հնագույն և ժամանակակից որմնանկարների վերականգնման հիմնային պատրաստվածություն:

Դասընթացը նախատեսվում է Երևանի Գեղարվեստի պետական ակադեմիայի ուսանողների և շրջանավարտների, ինչպես նաև ճարտարապետների և սույն բնագավառով հետաքրքրվող ու աշխատանքային փորձ ունեցող բոլոր ցանկացողների համար: Դասընթացներն անվճար են:
Առաջադեմ ուսանողներին կտրվի վկայական:

Հունիսի 18-ին, ՀՀ մշակույթի նախարարությունում` հնագիտական և որմնանկարների վերականգնման ու պահպանման դասընթացներին
նվիրված մամուլի ասուլիսին մասնակցում են`

Արև Սամուելյան- Հայաստանի Հանրապետության մշակույթի նախարարի տեղակալ,

Բրունո Սկապինի– Հայաստանի Հանրապետությունում Իտալիայի դեսպան,

Տիգրան Սահակյան– Հայաստանի Հանրապետության կրթության և գիտության, նախարարության արտաքին կապերի և սփյուռքի վարչության պետ,

Հովհաննես Թոքմաջյան- Երևանի ճարտարապետության և շինարարության պետական համալսարանի ռեկտոր,

Վարդգես Եդոյան – Երևանի ճարտարապետության և շինարարության պետական համալսարանի պրոռեկտոր,

Գայանե Կազնատի– «Մշակութային զարգացման հայ-իտալական ծրագրի» ղեկավար, ճարտարապետ,

Սուզաննա Բորտոլոտո- Միլանի Պոլիտեխնիկի դասախոս, ճարտարապետ։