Ծանուցում՝ ՀՀ մշակույթի նախարարությունից

ՀՀ մշակույթի նախարարության «Գրքի և հրատարակչական գործի կենտրոն» ՊՈԱԿ-ը 2013 թ. «Գրականության հրատարակում» և «Աջակցություն գրականության հրատարակմանը» ծրագրերով հրատարակվելիք գրականության ցանկերը ձևավորելու համար մինչև ս. թ հուլիսի 30-ը ընդունում է հայտեր հետևյալ ուղղություններով.

1. Հայոց ցեղասպանության 100-ամյակին նվիրված հանրագիտարանային, փաստավավերագրական և գեղարվեստական գրականություն:
2. Մանկապատանեկան գրականություն, այդ թվում` «Դպրոցական գրադարան» մատենաշարով` հայ դասական գրողների մանկապատանեկան ստեղծագործությունների ընտիր էջեր: «Գրականություն մանուկներին և պատանիներին» մատենաշարով հայ ժամանակակից հեղինակների մանկապատանեկան նոր ստեղծագործություններ, որոնք ունեն գեղարվեստական բարձր մակարդակ, արծարծում են մատաղ սերնդին հուզող հարցեր, դաստիարակում հայրենասիրական և համամարդկային զգացումներ:Մանկապատանեկան դաստիարակության ուսուցողական ձեռնարկներ, այդ թվում` քաղաքացիական դաստիարակությանը, Հայաստանի պատմությանը, աշխարհագրությանը, բնաշխարհին, հայոց լեզվին, առասպելներին, արվեստի պատմությանը, գեղագիտական հարցերին նվիրված հանրամատչելի պատկերազարդ գրականություն:

3. Հայաստանի մշակութային ժառանգությունը ներկայացնող գիտահանրամատչելի և ալբոմային գրականություն. մշակութաբանական, նյութական և հոգևոր (ոչ նյութական) մշակութային կարևոր արժեքներին նվիրված ուսումնասիրություններ:

4. Գեղարվեստական և այլ գրականություն` դասական հայ գրականության լավագույն նմուշների նորովի ձևավորումներով և պոլիգրաֆիական ժամանակակից որակով հրատարակություններ: «Հայ դասական պոեզիա» մատենաշարով` հայ դասական բանաստեղծների ստեղծագործությունների ընտիր էջեր:«Հայ դասական արձակ»` մատենաշարով, հայ դասական գրողների արձակ ստեղծագործությունների ընտիր էջեր:«Հայ ժամանակակից գրականություն» մատենաշարով` հայ ժամանակակից բանաստեղծների, արձակագիրների և դրամատուրգների նոր ստեղծագործություններ, որոնք ունեն գեղարվեստական բարձր մակարդակ, արծարծում են արդիական թեմաներ, քարոզում են համամարդկային գաղափարներ:

5. Հոբելյանական գրականություն:

6. Հայաստանում բնակվող ազգային փոքրամասնությունների գրականությունը, մշակույթը, հոգևոր և նյութական արժեքները ներկայացնող գրականություն:

7. Սփյուռքահայ գրականություն:

8. Թարգմանական գրականություն. դասական և ժամանակակից հայ գրողների ստեղծագործությունների, ինչպես նաև ժողովրդական բանահյուսության նմուշների թարգմանություններ: Համաշխարհային գրականության լավաույն նմուշների թարմանություններ հայերեն:

9. Երաժշտական գրականություն. երաժշտագիտություն, ուսումնական և մեթոդական ձեռնարկներ, նոտային գրականություն, մանկական երաժշտական բեմադրությունների պարտիտուրներ:

10. Սոցիալական գովազդի առաջարկներ

Հայտերը ներկայացնել ՀՀ մշակույթի նախարարության «Գրքի և հրատարակչական գործի կենտրոն»ՊՈԱԿ (հասցեն` Իսահակյան 28,հեռ. 52-86-70, 52-86-10):