«Մաթեմատիկա» առարկայի գնահատականների բողոքարկումն այսօր է

ԳԹԿ-ն հայտնում է, որ «Մաթեմատիկա» առարկայի քննության արդյունքների բողոքարկումը տեղի կունենա հունիսի 18-ի 9:00–ից մինչև 18:00-ն:

Դիմորդը քննական արդյունքի հետ անհամաձայնության դեպքում կարող է բողոքարկել այն նույն կենտրոնում, որտեղ հանձնել է քննությունը:

Երեկ քննական կենտրոններում ներկայացվել են «Մաթեմատիկա» առարկայի պետական ավարտական և միասնական քննությունների արդյունքները։ ԳԹԿ-ից հայտնում են, որ «Մաթեմատիկա» առարկայի քննության միջին գնահատականը 11,6 է: «Մաթեմատիկայի» քննությանը մասնակցել է 8598 դիմորդ, 359 հոգի բացակայել է:

«Մաթեմատիկայից» առավելագույն 20 միավոր է ստացել 77 դիմորդ, 17,5-20 միավոր ստացել է 747 դիմորդ, 13,5-17,25՝ 2177 դիմորդ, իսկ 7,5-13,25՝ 4338 դիմորդ: Դրական միավորի՝ 7.5-ի շեմը չի հաղթահարել 1336 դիմորդ:

Հիշեցնենք, որ «Մաթեմատիկա» առարկայի պետական ավարտական եւ միասնական քննությունը կայացել է հունիսի 12-ին: Քննությանը մասնակցելու համար դիմում-հայտ էր ներկայացրել 8 հազար 957 դիմորդ: