Այս տարին սակավաջուր տարի է, և ջրի քանակի հետ կապված լուրջ պրոբլեմներ ունենք. Ադիբեկ Ղազարյան

Այս տարին սակավաջուր տարի է, և լուրջ պրոբլեմներ ունենք ջրի քանակի հետ կապված: Այս մասին այսօր լրագրողների հետ հանդիպման ժամանակ հայտարարեց Տարածքային կառավարման նախարարության ջրային տնտեսության պետական կոմիտեի ԾԻԳ տնօրեն Ադիբեկ Ղազարյանը:

«Սովորական տարի չէ, քանի որ այն ջրամբարները, որոնք սպասարկում են Արարատյան դաշտավայրը, այս տարի բավական սակավաջուր են: Օրինակ, Ապարանի ջրամբարը 75 մլն խորանարդ մետր պակաս ջուր է հավաքել, քան մյուս տարիներին»,- ասաց Ղազարյանը՝ հավելելով, որ այն անհրաժեշտ քանակությամբ ջուրը, որ պետք է նորմալ բերք ստանալու համար, այս տարի նորմայից բարձր է: Ղազարյանը կոչ արեց խնայողաբար օգտագործել ջուրը:

Նա տեղեկացրեց, որ հանրապետությունում 155,000 հեկտար ոռոգելի հող կա: 130,000 հեկտար ինտենսիվ ոռոգվող հողերից 73,000 հեկտարը Արարատյան դաշտավայրում է գտնվում: Ադիբեկ Ղազարյանն ընդգծեց ոռոգման ջրի կարևորությունը հատկապես Արարատյան դաշտավայրի համար:

«Այս տարի ջրաղբյուրներից՝ գետերից, ջրամբարներից ու Սևանա լճից անհրաժեշտ է վերցնել մոտ 1 միլիարդ 130 միլիոն խորանարդ մետր»,- նշեց նա: Ղազարյանի պնդմամբ՝ կառավարությունն ամեն ինչ անում է, որ այս տարի ջրի պակասորդը չանդրադառնա գյուղատնտեսության վրա: