Հայաստանում ռուսական ռազմաբազայի պայմանագրային զինծառայողների թվաքանակը կկրկնապատկվի

Հայաստանում գտնվող ռուսական ռազմաբազայում ծառայող պայմանագրային զինծառայողների թվաքանակը մինչև տարվա վերջ կկրկնապատկվի։ Այս մասին լրագրողների հետ հանդիպման ընթացքում հայտարարել է Հարավային ռազմական օկրուգի մամլո ծառայության ղեկավար, գնդապետ Իգոր Գորբուլը։

Գյումրիում տեղակայված 102-րդ ռուսական ռազմաբազան համարվում է ԱՊՀ–ի հակաօդային պաշտպանության միասնական համակարգի անբաժանելի մասը։ «Մինչև այս տարվա վերջ, Հայաստանում գտնվող ռուսական ռազմաբազայում պայմանագրային զինծառայողների թիվը կրկնապատկվի։ Միևնույն ժամանակ ռազմաբազայի ընդհանուր հզորությունը չի փոխվի», – ասել է Գորբուլը։ 

Նա նշել է, որ Հայաստանում տեղակայված ռուսական ռազմաբազայի մասնագիտական խմբի համալրումն արդեն մեկնարկված է, հաղորդում է Ռիա նովոստին։ 

«Այս պահին պայմանագրային զինվորական ծառայության անցած զինծառայողները 3–ամսյա փորձաշրջան են անցնում։ Հետագայում նրանք կուղարկվեն Ռուսաստանում գործող ռազմաուսումնական կենտրոններ, որտեղ լրացուցիչ վերապատրաստման կուրսեր կանցնեն և համապատասխան որակավորում կստանան», – ավելացրել է Հարավային ռազմական օկրուգի մամլո ծառայության ղեկավարը։  

Հիշեցնենք, որ Հայաստանում ռուսական ռազմաբազայի տեղակայման ժամկետը 2010–ի օգոստոսի 20–ին երկարացվեց։ Պայմանագիրը ստորագրվել է 1995–ին, որի ժամկետը 25 տարով էր։ Այժմ այն ուժի մեջ է մինչև 2044 թվականը։ Պայմանագիրը նախատեսում է նաև աշխարհագրական և ռազմավարական պատասխանատվության շրջանակների ընդլայնում։ Ռազմաբազան հագեցած է զենիթահրթիռային С-300 պաշտպանական համակարգերով և МиГ-29 կործանիչներով։ Ռազմաբազայում պայմանագրային զինծառայողների թվաքանակը մոտավորապես հասնում է 5 հազարի, որոնցից 2.5 հազարը ռուսներ են, իսկ ավելի քան 2 հազարը՝ հայեր։