Արդեն մեկ տարի է՝ պարում ենք հայերեն

Անցյալ տարի հունիսի 19-ին «Պարենք Հայերեն» երիտասարդական նախաձեռնությունն անցկացրեց իր առաջին պարի բաց դասը Մալաթիա-Սեբաստիա վարչական շրջանում։ Նախաձեռնությունը ծնվեց մի խումբ երիտասարդների մտքում, ովքեր արժևորում էին ազգային պարն ու ցանկանում էին տարածել այն։

Մենք խնդրեցինք նախաձեռնության հեղինակներից մեկին՝ Տիգրան Մարտիրոսյանին հիշել «Պարենք Հայերենի»-ի ծնունդը, ամփոփել գործունեության մեկ տարին ու պատմել ապագայի պլանների մասին։

«Այսօր «Պարենք Հայերեն» երիտասարդական նախաձեռնության ծննդյան միամյակն է: 2011թ-ի հունիսի 19-ին տեղի ունեցավ մեր առաջին միջոցառումը: Ճիշտ է, գաղափարը ծնվել է մինչ այդ, և հսկայական նախապատրաստական աշխատանքներ են տարվել, բայց դա կարծես սաղմնային՝ ձևավորման, շրջան լիներ. ծնունդը հենց այս օրն էր: Հիշում եմ առաջին օրվա բոլորիս ոգևորվածությունը, հուզմունքն ու անհանգստությունը, թե ինչպե՞ս կստացվի, կկայանա՞ արդյոք նախաձեռնությունը, ինչքանո՞վ կկարողանա իրականացնել իր նպատակները: Մեկ տարի անց կարող եմ ասել, որ նախաձեռնությունը հաջողեց և կայացավ: Ճիշտ է՝ մեկ տարին շատ չի, բայց քիչ էլ չի նման գնահատական տալու համար: Բնականաբար մեր նպատակներին հասնելու համար դեռ երկար ճանապարհ ունենք անցնելու, դեռ շատ դժվարություններ ունենք հաղթահարելու, բայց կանգ առնել այլևս անհնար է:

Հիմա փորձեմ մի քանի խոսքով ամփոփել այս մեկ տարվա գործունեությունը:

Ինչպես գիտեք, «Պարենք Հայերեն» նախաձեռնությունը ստեղծվել է «Կարին» ավանդական երգի-պարի համույթի սիրողական խմբակների սաների կողմից բացառապես կամավորական հիմունքների վրա և չի հետապնդում որևէ շահույթ: Նախաձեռնության նպատակն է նպաստել հայկական ավանդական պարերի տարածմանը, որովհետև համոզված ենք, որ մշակույթի պահպանման ամենալավ միջոցը ժողովրդին այդ մշակույթի կրող դարձնելն է: Որպեսզի բոլոր տոնակատարություններին, հարսանիքներին, խնջույքներին կրկին պարվեն մեր ավանդական պարերը: Որովհետև, երբ մշակույթը կիրառական է, այսինքն գործածվում է հասարակության, մարդու առօրյայում, ապա այն անհնար է կորցնել կամ խեղաթյուրել: Ուստի մեր ավանդական պարերի պահպանումն ու սերունդներին փոխանցումը մեզ համար դարձել է նպատակ: Իհակե այս խնդիրը առկա է հայկական մշակույթի բոլոր ոլորտներում, բայց այսօր արդեն ամեն մի ոլորտում էլ կան գործող նախաձեռնություններ: Մի քիչ ավելի ակտիվ, մի քիչ ավելի պասիվ, բայց ամեն մեկն իր հնարավորությունների սահմաններում աշխատում է հնարավորինս ճիշտ մատուցել մեր մշակութային նմուշները և նպաստել դրանց տարածմանն ու պահպանմանը: Եվ այս նպատակին հասնելու համար «Պարենք Հայերեն» նախաձեռնությունը ողջ ամառ բակերում և այգիներում կազմակերպում և անցկացնում է ազգագարական պարի բաց դասընթաց-միջոցառումներ, իսկ մյուս եղանակներին այցելում է դպրոցներ, մանկատներ, ծերանոցներ:

Այս մեկ տարվա ընթացքում «Պարենք Հայերեն» նախաձեռնությունը, համագործակցելով Մալաթիա-Սեբաստիա վարչական շրջանի ղեկավարության հետ,Հ.Ա.Թ.-ում կազմակերպել և անցկացրել է տասից ավելի միջոցառում: Անցած ամառ այցելել ենք նաև Հանքավանի «Արագած» ճամբար և ճամբարի մոտ 300 անապահով ընտանիքների երեխաների հետ նույնպես պարել ենք հայերեն: Միջոցառումներ ենք կազմակերպել նաև Էջմիածնի Արաքս գյուղում, Նոյեմբերյանի Կողբ գյուղի գեղարվեստի դպրոցում, Արցախի Քարվաճառում: Աշնան և ձմռան ընթացքում այցելել ենք տարբեր դպրոցներ և ուսումնական հաստատություններ, այդ թվում՝ Մարի Իզմիրլյանի անվան մանկատուն: Վերջերս, համագործակցելով «Փոքրիկ Իշխան» կրթահամալիրի հետ, միջոցառում անցկացրեցինք նաև Նոր Հաճընում անապահով ընտանիքների երեխաների համար:

Այս ամառ արդեն վերսկսել ենք բացօթյա միջոցառումների շարքը: Մարզեր գնալու պլաններ նույնպես կան: Մոտակա միջոցառումը տեղի կունենա հունիսի 23-ին, ժամը 19:30-ին Հ.Ա.Թ-ում՝ Զորավար Անդրանիկի արձանի և սուրբ Երրորդություն եկեղեցու միջև ընկած այգում: Ի դեպ այս միջոցառումը կնվիրվի նախաձեռնության միամյակին և այս առիթով ուզում եմ շնորհավորել բոլորիս: Առաջին հերթին շնորհավորում եմ նրանց, ովքեր սերտոներն կապված ու նվիրված են «Պարենք Հայերենին» և իրենց ժամանակն ու միջոցները չեն խնայում «Պարենք Հայերենի» գաղափարները իրականություն դարձնելու համար: Շնորհավորում եմ նաև բոլոր նրանց, ովքեր թեկուզ մի փոքր առնչություն ունեն նախաձեռնության հետ, և նրանց, ովքեր ապագայում են ունենալու: «Պարենք Հայերենը» բոլորիս ձեռքբերումն է: Եվ այն գոյություն է ունենալու այնքան ժամանակ, քանի դեռ հայկական հողի որևէ անկյունում հայերեն պարելը խնդիր կլինի:
Շնորհավորում եմ բոլորիս: Եվ թող մոտ ապագայում գա այն օրը, երբ բոլոր հայերը կիմանան հայերեն պարել, և դասընթաց-միջոցառումների փոխարեն ուղղակի կհավաքվենք պարելու և պարատոներ կկազմակերպենք»:

Լուրեր.com-ը, գնահատելով այն կարևոր գործը, որ կատարում է «Պարենք հայերեն»-ը, շնորհավորում է նախաձեռնության գործունեության մեկ տարին և մաղթում բեղմնավոր գործունեություն և հաջողություն իրենց ազգանվեր գործում։