Լեռնային Ղարաբաղում այսօր մեկնարկում է նախըտրական քարոզարշավը

Լեռնային Ղարաբաղի Հանրապետությունում կայանալիք նախագահական ընտրություններին կազմավորվել է 274 ընտրական տեղամաս:

Ինչպես տեղեկացնում է ԼՂՀ կենտրոնական ընտրական հանձնաժողովը, տեղամասերից մեկը Հայաստանի Հանրապետությունում ԼՂՀ ներկայացուցչությունում է՝ ՀՀ-ում ժամանակավորապես գտնվող կամ բնակվող ԼՂՀ քաղաքացիների ընտրական իրավունքի իրականացումն ապահովելու համար:

ԼՂՀ բոլոր շրջաններում կազմակերպվել են տեղամասային ընտրական հանձնաժողովների անդամության թեկնածուների մասնագիտական դասընթացներ, որտեղ ուսուցանվել և որակավորում են ստացել ընտրական հանձնաժողովների անդամության թեկնածուներ՝ առաջիկայում կազմավորվող տեղամասային ընտրական հանձնաժողովների կազմը անհրաժեշտ թվով անդամներով համալրելու համար: Պատվիրվել են քարոզչական պաստառներ, ձևաթղթեր, գործավարության մատյաններ, ընտրական գրականություն՝ ընտրական հանձնաժողովներին, դիտորդներին, վստահված անձանց եւ ընտրությունների հետ առնչվող մյուս մարմիններին տրամադրելու համար:

Այսօր ԿԸՀ-ում վիճակահանությամբ կհաստատվի ԼՂՀ Նախագահի ընտրությանը մասնակցող թեկնածուներին նախընտրական քարոզչության ժամանակ հանրային հեռուստատեսությամբ և հանրային ռադիոյով վճարովի և անվճար եթերաժամ տրամադրելու ժամանակացույցը, և կմեկնարկի նախընտրական քարոզչությունը, որը կավարտվի հուլիսի 17-ին՝ ժամը 24.00-ին:

Ընտրությունների ընթացքում դիտորդական առաքելություն են իրականացնելու մի քանի տեղական կազմակերպություններ՝ ԼՂՀ «Արցախի ժուռնալիստների միություն» հասարակական կազմակերպությունից Կիմ Գաբրիելյանը, Արամայիս Գարաքյանը, Արիս Գրիգորյանը, ԼՂՀ վերաբնակեցման եւ հայրենադարձության «Քաշաթաղցիներ» հասարակական կազմակերպությունից Համբարձում Արզանյանը, Գոռ Եսայանը, Գոռ Մանուկյանը: Դիտորդական առաքելություն իրականացնող միջազգային կազմակերպություններ առայժմ չեն գրանցվել:

Լեռնային Ղարաբաղի հանրապետությունում նախագահական ընտրությունները կայանալու են 2012 թվականի հուլիսի 19-ին: Որոշումը կայացվել է մարտի 29-ին Լեռնային Ղարաբաղի խորհրդարանի լիագումար նիստում: 2007 թվականի հուլիսի 19-ին կայացած ԼՂՀ նախորդ նախագահական ընտրությունների արդյունքում նախագահ էր դարձել Բակո Սահակյանը: