Հոսնի Մուբարաքը մահամերձ է

Interfax.ru գործակալության տեղեկացմամբ՝ Կահիրեից մատուցում են իրարամերժ տեղեկություններ Եգիպտոսի նախկին նախագահ Հոսնի Մուբարաքի առողջական վիճակի մասին: Լուրերից մեկի համաձայն՝ նա կլինիկական մահ է տարել, ըստ որոշ լուրերի՝ պարզապես կոմայի մեջ է:

Եգիպտական «ՄԵՆԱ» գործակալությունը «Ամերիկայի ձայն» ռադիոկայանին փոխանցել է, որ Եգիպտոսի նախկին նախագահ Հոսնի Մուբարակը բանտային հիվանդանոցում կլինիկական մահվան մեջ է: Գործակալության աղբյուրների հավաստմամբ՝ նա, երեքշաբթի օրը գտնվելով բանտային հիվանդանոցում, ստացել է ինսուլտ, որից հետո տեղափոխվել է մոտակա զինվորական հիվանդանոց, որտեղ բժիշկները ախտորոշել են կլինիկական մահ: Որոշ տեղեկությունների համաձայն՝ Մուբարաքի սիրտը կանգ է առել և որոշ ժամանակ չի արձագանքել սարքին:

Եգիպտոսի Գերագույն ռազմական խորհրդի կազմի մեջ մտնող գեներալ Սայիդ Աբասը, որը ղեկավարում էր երկիրը անցումային շրջանում, հայտարարել է, որ «ցանկացած խոսակցություն, թե Մուբարաքը կլինիկական մահ է տարել, անհեթեթ է»,-հաղորդում է «Ինտերֆաքսը»:

Ըստ «Ալ Ջազիրայի»՝ բժիշկները հնարավոր բոլոր միջոցները ձեռնարկել են, և նախկին նախագահի առողջական վիճակը բարելավվում է:

«Ինտերֆաքս»-ը հիշեցնում է, որ Հոսնի Մուբարաքի առողջական վիճակը սկսել է կտրուկ վատանալ անցյալ տարվա գարնանը եգիպտական հեղափոխության արդյունքում նրա իշխանության տապալումից և ձերբակալումից հետո: