«Դեմ ենք թանկացմանը» նախաձեռնության հայտարարությունը

Հունիսի 19-ին Վանաձորում Երեւան-Վանաձոր-Երեւան երթուղու սակագների թանկացման դեմ պայքարող «Դեմ ենք թանկացմանը» քաղաքացիական նախաձեռնություն է ստեղծվել: Խումբը, մտահոգված լինելով երթուղու գների բարձրացման խնդրով, համոզմունք է հայտնում, որ ուղեվարձի գնի բարձրացումն ուղղակիորեն ազդելու է բնակչության սոցիալական վիճակի վրա:

Հունիսի 18-ից թանկացել են Վանաձոր-Երեւան-Վանաձոր միկրոավտոբուսների գները՝ նախկին 1200 դրամի փախարեն դառնալով 1400 դրամ: Թանկացել են նաեւ ուղեւորափոխադրումներ իրականացնող մեկ այլ՝ «Վանաձոր» ընկերության տաքսիների սպասարկման գները, մասնավորապես՝ «Հոնդա» մակնիշի մեքենայով Երեւան մեկնելու համար նախկին 1500-ի փոխարեն վճարը դարձել է 1800 դրամ:

«Հայավտոկայան» ընկերության Վանաձորի մասնաճյուղի պետ Սահակ Ռուբենյանը հաստատել է գների թանկացման լուրը, նշելով, որ տվյալ ուղղություններով երթուղի իրականացնող Վանաձորում՝ «Ոսկեթեւ» եւ Երեւանում գործող «Գասուռ» ընկերություններն ամիսներ առաջ դիմել են նախարարություն՝ գների թանկացման հայցով, իսկ հիմք ընդունվել է պահեստամասերի եւ վառելիքի գները.

«Իրենք դիմել են, նախարարությունը որոշել է բավարարել նրանց խնդրանքը: Գների թանկացման հրամանը տրվել է հունիսի 12-ին, կիրառության մեջ մտել հունիսի 18-ին»:

«Դեմ ենք թանկացմանը» քաղաքացիական նախաձեռնությունը կոչ է անում պատասխանատու մարմիններին վերանայել որոշումը: