Լեոնիդը բազմաբևեռ մագնիս էր. Գագիկ Գինոսյան

Վաղը Արցախյան ազատամարտի հրամանատարներից մեկի՝ Լեոնիդ Ազգալդյանի մահվան քսաներորդ տարելիցն է։

Այդ առթիվ այսօր լրագրողների հետ հանդիպել էին «Կարին» ավանդական երգի-պարի խմբի գեղարվեստական ղեկավար, Լեոնիդ Ազգալդյանի «Ազատագրական բանակ» ջոկատի զինվոր Գագիկ Գինոսյանն ու «Ազատագրական բանակի» թիկունքի պետ Նորիկ Գալստյանը։

Բանախոսները պատմեցին Ազգալդյանի կյանքի, մարտական գործողությունների, նրա հրամանատարական տաղանդի և սկզբունքների մասին։

«Մինչ «Ազատագրական բանակը», Ազգալդյանն Աշոտ Նավասարդյանի հետ ստեղծել է «Անկախության բանակը»՝ առաջին ռազմական միավորներից մեկը, որը մարտական գործողությունների է մասնակցել։ Իսկ երբ Նավասարդյանն ստեղծեց ՀՀԿ-ն, սկզբունքորեն անկուսակցական Ազգալդյանն առանձնացավ և ստեղծեց «Ազատագրական բանակը»,-ասաց Գագիկ Գինոսյանը։

Նորիկ Գալստյանն էլ նշեց, որ Ազգալդյանի ջոկատը, որի շեֆությունը վերցրել էր ԵՊՀ անձնակազմը, ամենաապահովված ջոկատներից մեկն էր ամբողջ ազատամարտի ընթացքում։ «Երբ բոլոր ջոկատները փամփուշտի խնդիր ունեին, Լեոնիդի ջոկատն ավելի քան հարյուր հազար փամփուշտ ուներ։ Բոլոր ջոկատներից նրանք առաջինն են զրահաբաճկոններ ունեցել։ Ավելի դժվար էր սննդամթերքի հարցը. շատերն են օգնել, որ կարողանանք սննդով ապահովել ավելի քան 250 մարտիկներից կազմված ջոկատը»,-ասաց «Ազատագրական բանակի» թիկունքի պետը։

«Լեոնիդը Նժդեհի գաղափարները կրող եզակի հրամանատարներից էր Արցախյան ազատամարտում, նա միշտ եղել է նախաձեռնողը, ոգի տվողը, կռվել է զինվորի կողքին և ոչ մի անգամ թիկունքից չի հրամայել։ Նրա հանճարը գաղափարական էր։ Մագնիսը երկու բևեռ է ունենում, բայց Լեոնիդը բազմաբևեռ մագնիս էր. նա ձգում էր տարբեր տեսակի մարդկանց, ու անհասկանալի է, թե ինչպես էր նրան դա հաջողվում։ Շատերն էին խնդրում ջոկատում ընդգրկվել, իսկ այնտեղ խիստ կանոններ կային՝ չծխել, չխմել, զենքի հանդեպ միշտ ուշադիր լինել։ Բայց կամավորները նրա մոտ էին գալիս»,- ասաց Գինոսյանը։