Լեոնիդ Ազգալդյանի մասին գիրք կգրվի և ֆիլմ կնկարահանվի

1992 թ. հունիսի 21-ին՝ քսան տարի առաջ, զոհվեց «Ազատագական բանակ» ջոկատի հիմնադիր և հրամանատար Լեոնիդ Ազգալդյանը։ Ու թեև արդեն քսան տարի է անցել, բայց 27 գյուղ ազատագրած և պատերազմի ողջ ընթացքում միայն 6 զոհ տված հրամանատարի մասին անգամ մեկ գիրք չկա։ Այդ մասին այսօր խոսեց Ազգալդյանի զինվոր և «Կարին» համույթի գեղարվեստական ղեկավար Գագիկ Գինոսյանը։

«Որևէ ազատամարտիկի ավանդը պատերազմում չեմ ուզում նսեմացնել, բայց շատ-շատերը, ովքեր իրենց կատարած դերով հաստատ զիջում են Լեոնիդ Ազգալդյանին, այսօր ավելի մեծ պատիվների են արժանանում և ավելի շատ են հիշվում, քան նա»,-ասաց Գինոսյանը՝ հավելելով, որ իրենք նամակով դիմել են նախագահին՝ խնդրելով հոբելյանական միջոցառումներ կազմակերպել, քանի որ այս տարի լրանում է Ազգալդյանի մահվան քսաներորդ տարելիցը, իսկ նոյեմբերին նա կդառնար 70 տարեկան։

«Մոտ մեկ ժամ առաջ պատասխան ստացանք, որ մինչև ծննդյան օրը Լեոնիդի մասին նոր ֆիլմ կնկարահանվի, նրա մասին գրքի աշխատանքները կսկսվեն, և հոբելյանական միջոցառումներ կլինեն։ Սակայն մենք այսքանով չենք բավարարվելու և ամեն ինչ անելու ենք, որ Լեոնիդի անունով փողոց կամ գոնե դպրոց անվանակոչվի, քանի որ նա դրան արժանի է, և վաղուց պիտի այդպես արված լիներ»,- ասաց Գինոսյանը։

Իսկ Նորիկ Գալստյանն ասաց, որ Ադրբեջանի շարունակական ագրեսիվության և վերջին գործողությունների պայմաններում ճիշտ կլիներ, որ դպրոցներում և երիտասարդների համար ցուցադրվեին Լեոնիդի և մյուս ազատամարտիկների մասին պատմող ֆիլմեր, թեև ո´չ մշակույթի, ո´չ Կրթության և գիտության նախարարություններն այդ ուղղությամբ ոչինչ չեն անում։

Անդրադառնալով Ազգալդյանի հետ կապված ևս մեկ ցավոտ հարցի՝ նրա՝ Ազգային հերոսի կոչում չունենալուն, Նորիկ Գալստյանն ասաց, որ բազմիցս տարբեր նախաձեռնություններ այդ խնդրանքով դիմել են ՀՀ բոլոր նախագահներին և մերժում են ստացել։ «Նրան հերոսի կոչում չտալը քաղաքական հարց է»,- ասաց նա։

Իսկ Գինոսյանն ամփոփեց. «Հերոսի կոչում տալիս է ժողովուրդը, իսկ կնիքը դնում է ժամանակը»։