ՀՀ ժողովրդական նկարիչ, քանդակագործ Լևոն Թոքմաջյանը 75 տարեկան է

ՀՀ ժողովրդական նկարիչ, քանդակագործ Լևոն Թոքմաջյանը հայ կերպարվեստի զարգացման և հանրահռչակման գործում ունեցած նշանակալի ավանդի համար, ինչպես նաև ծննդյան 75-ամյակի առթիվ պարգևատրվել է ՀՀ մշակույթի նախարարության Ոսկե մեդալով:

Լևոն Թոքմաջյանն ավարտել է Փ. Թերլեմեզյանի անվան գեղարվեստի ուսումնարանը, Երևանի Գեղարվեստի պետական ակադեմիան, այնուհետև, Երևանի Պետական կոնսերվատորիան: 1969 թ.-ից Հայաստանի նկարիչների միության անդամ է, 2008 թ.-ից դասավանդում է ԵՃՇՊՀ գծանկարի, գունանկարի և քանդակի ամբիոնում: 1975 թ. Օրոնսկ քաղաքում «Ղարաբաղցի կինը» մարմարե քանդակի և 1986 թ. Թբիլիսիում Անդրկովկասյան երկրների կերպարվեստի բիենալեում «Գործող կինը» ստեղծագործությունների համար արժանացել է «GRAN PRIZ» մրցանակի, իսկ 1981 թ. Ռավեննայում Դանթեին նվիրված բիենալեում` «Ոսկե մեդալ» քաղաքի պատվավոր դիպլոմի: Էջմիածնում կատարած գործերի և վաստակի համար` 2010 թ. արժանացել է «Էջմիածին քաղաքի պատվավոր քաղաքացի» կոչմանը, նույն թվականին նաև` «Թեքեյան» ամենամյա մրցանակի:

Քաղաքի մշակութային դիմանկարի, գեղագիտական ձևավորման մաս են կազմում վարպետի ձեռամբ կերտած Մարտիրոս Սարյանի մարմարե հուշարձանը, ծաղիկ նվիրող Կարա-Բալայի բրոնզե քանդակը, Էջմիածնում` Եղեռնի զոհ դարձած 12 հայ մտավորականների՝ Կոմիտասի, Զոհրապի, Սիամանթոի, Վարուժանի և այլ նշանավոր գործիչների խմբակային բազալտե հուշարձանը:

Լևոն Թոքմաջյանի ինքնատիպ աշխատանքների մի մասն էլ գտնվում են արտերկրում, մասնավորապես` Ռուսաստանի, Ուկրաինայի տարբեր քաղաքներում,Կիպրոսում, Նիկոսիայում, Ֆրանսիայում և այլուր: